ءبىر جىلدا ا ق ش- تا 41 جاپپاي كىسى ءولتىرۋ وقيعاسى بولىپ، 211 ادام قازا بولعان
نۇر-سۇلتان. قازاقپارات - 2019-جىل — ا ق ش- تا جاپپاي ادام ءولىمى ەڭ كوپ بولعان جىل بولدى، دەپ حابارلايدى قازاقپارات BBC سايتىنا سىلتەمە جاساپ.
اسسوشيەيتەد پرەسس اگەنتتىگىنىڭ، USA Today باسىلىمىنىڭ جانە سولتۇستىك-شىعىس ۋنيۆەرسيتەتىنىڭ زەرتتەۋىنە سايكەس، 41 وقيعا بولىپ، 211 ادام قازا تاپقان.
جاپپاي ادام ءولىمى دەپ شابۋىل جاساۋشىلاردىڭ جاعىنان بولعان ادام شىعىنان قوسپاعاندا، ءبىر وقيعادان ءتورت نە ودان دا كوپ ادامنىڭ كوز جۇمۋىن ايتادى.
2019-جىلى ا ق ش- تاعى جاپپاي ادام ءولىمى بولعان وقيعالار: مامىردا ۆيردجينيي- بيچتا (ۆيردجينيا شتاتىندا) 12 ادامنىڭ جانە ەل-پاسودا تامىزدا 22 ادامنىڭ قازا بولۋى.
زەرتتەۋگە سايكەس، جاپپاي كىسى ءولتىرۋ وقيعالارى كاليفورنيادا كوپ بولعان.
وسىنداي 41 قاندى وقيعانىڭ 33 ىندە اتىس قارۋى قولدانىلعان.
بۇل ستاتيستيكا 2006-جىلدان بەرى قۇرىلىپ كەلەدى، ءبىراق زەرتتەۋلەر 1970-جىلدان بەرى جۇرگىزىلۋدە.
«2019-جىل جاپپاي كىسى ءولىمى ەڭ كوپ بولعان جىل بولدى»، - دەپ جازدى اسسوشيەيتەد پرەسس. جاپپاي ادام ءولىمى سانى بويىنشا 2006-جىلى دا كوپ بولعان، ول كەزدەگى قۇرباندار سانى - 38.
«ا ق ش- تا جاپپاي ادام ءولىمى سانى ءوستى»، - دەپ اتاپ ءوتتى ميننەسوتاداعى ۋنيۆەرسيتەتتىڭ كريمينولوگى مەن پروفەسسورى دجەيمس دەنسلي. ونىڭ پىكىرىنشە، مۇنداي قىلمىستار تولقىندارمەن ءجۇرىپ جاتىر، ال كەيدە ونى امەريكا قوعامىندا «اشۋ مەن كوڭىلسىزدىك ۋاقىتىمەن» بايلانىستىرۋعا بولادى.
تامىز ايىندا تەحاس ەل-پاسو جانە دەيتونداعى (وگايو) اتىستان كەيىن ا ق ش پرەزيدەنتى دونالد ترامپ اۆتوماتتىق ۆينتوۆكالاردى ساتۋعا تىيىم سالۋعا ەرتە دەپ مالىمدەدى. «ءبىراق مەن، ارينە، ماسەلەنى كوتەرەمىن. قاتاڭ تەكسەرۋلەر ەنگىزۋگە سۇرانىس بار»، - دەدى ترامپ. ول جاپپاي اتىستى ۇيىمداستىراتىن ادامدى پسيحيكالىق اقاۋىمەن بايلانىستىرادى.
