قازاقستانعا پراگادان 40 باس كەرقۇلان جىلقىسى اكەلىنبەك

پراگا. قازاقپارات - چەحيا رەسپۋبليكاسىنىڭ پراگا قالاسىندا پرجيەۆال(كەرقۇلان) جىلقىسىن قازاقستانعا جەرسىندىرۋ جوباسىن جوسپارلاۋ بويىنشا حالىقارالىق سەمينار ءوتتى، دەپ حابارلايدى قازاقپارات.

ەكولوگيا جانە تابيعي رەسۋرستار مينيسترلىگىنىڭ مالىمەتىنشە، سەمينار پراگا حايۋاناتتار باعى وسى جىلدىڭ ءساۋىر ايىندا ق ر مەن چەحيا ۇكىمەتتەرى اراسىندا قول قويىلعان قازاقستانداعى جابايى جىلقىلار پوپۋلياتسياسىن جانداندىرۋ جونىندەگى ۇزاقمەرزىمدى ىنتىماقتاستىق تۋرالى مەموراندۋم اياسىندا ۇيىمداستىرىلعان.

ءىس-شاراعا بەرلين، نيۋرنبەرگ جانە بۋداپەشت حايۋاناتتار باعىنىڭ، فرانكفۋرت زوولوگيالىق قوعامىنىڭ، قازاقستاننىڭ بيوالۋانتۇرلىلىگىن ساقتاۋ قاۋىمداستىعىنىڭ، حورتوباگ ۇلتتىق پاركىنىڭ (ۆەنگريا) جانە ۇلكەن گوبي قورىعىنىڭ (موڭعوليا) وكىلدەرى قاتىستى.

قازاقستاندىق دەلەگاتسيانى ەكولوگيا جانە تابيعي رەسۋرستار ءبىرىنشى ۆيتسە-ءمينيسترى نۇركەن شاربيەۆ باسقاردى.

قاتىسۋشىلار جىلقىلاردىڭ ءبىرىنشى توبىن 2024 -جىلى ەلىمىزگە تاسىمالداۋدىڭ ەگجەي-تەگجەيلى جوسپارىن تالقىلادى.

ايتا كەتۋ كەرەك، جانۋارلاردى جەتكىزۋ ماسەلەسىن پراگا زووباعى مەن چەحيا رەسپۋبليكاسىنىڭ قورشاعان ورتانى قورعاۋ مينيسترلىگى بىرلەسىپ قامتاماسىز ەتپەك.

قازاقستانعا جىلقىلاردى جەرسىندىرۋ ءۇشىن «التىن دالا» مەملەكەتتىك تابيعي رەزەرۆاتىنىڭ اۋماعى تاڭدالدى. جانۋارلار بەيىمدەلۋدىڭ ءبىرىنشى جىلىن قازاقستاننىڭ بيوالۋانتۇرلىلىگىن ساقتاۋ قاۋىمداستىعىنىڭ رەينترودۋكتسيالاۋ ورتالىعىندا وتكىزەدى.

بارلىعى ەۋروپادان قازاقستانعا 40 قا جۋىق جانۋار اكەلۋ جوسپارلانعان.

ايتا كەتەيىك، قازاقستان ماماندارى چەحيادان پرجيەۆال جىلقىسىن اكەلىپ، قازاق دالاسىندا تۇزداي قۇرىپ كەتكەن ءتول تۇقىمدى قايتا جانداندىرماق نيەتتە ەكەنىن جازعان ەدىك.