18:30, 17 - مامىر 2023 | GMT +5
ق ر پرەزيدەنتى قىتايمەن ساۋدا-ساتتىقتى 40 ميلليارد دوللارعا جەتكىزۋدى ۇسىندى
شيان. قازاقپارات - قازاقستان پرەزيدەنتى قاسىم-جومارت توقايەۆ قىتايمەن ءوزارا ساۋدا-ساتتىقتى 40 ميلليارد دوللارعا جەتكىزۋدى ۇسىندى، دەپ حابارلايدى قازاقپارات.
«بۇگىندە قىتاي - قازاقستاننىڭ نەگىزگى ساۋدا سەرىكتەستەرىنىڭ ءبىرى. وتكەن جىلدىڭ قورىتىندىسى بويىنشا ءوزارا ساۋدا-ساتتىق كولەمى 30 جىلدىڭ ىشىندەگى رەكوردتىق دەڭگەيگە جەتىپ، 31 ميلليارد دوللاردان استى. مۇنداي قارقىنمەن ءبىز جاقىن ارادا تاۋار اينالىمى كورسەتكىشىن 35 ميلليارد دوللارعا دەيىن جەتكىزۋ ماقساتىنا قول جەتكىزە الامىز دەپ ويلايمىن. سوندىقتان 2030-جىلعا قاراي 40 ميلليارد دوللارلىق مەجەنى بەلگىلەۋدى ۇسىنامىن. وسى ماقساتقا جەتۋ ءۇشىن ءبىز ءوزارا ساۋدا نومەنكلاتۋراسىن كەڭەيتە الار ەدىك»، - دەدى ق. توقايەۆ.
بۇعان دەيىن حابارلاعانىمىزداي، قازاقستان مەن قىتاي باسشىلارى بۇگىن بەيجىڭدە كەلىسسوز جۇرگىزدى. ق ر پرەزيدەنتى ق. توقايەۆ قىتايدا مەملەكەتتىك ساپارمەن ءجۇر.
