پەتروپاۆلدا ءبىر كاسىپورىندا 40 جىل تىگىنشى بولعان ايەل ماراپاتتالدى
ماراپاتقا يە بولعانداردىڭ اراسىندا تىگىن فابريكاسىنىڭ تەحنولوگى رايحان ساعىندىقوۆا دا بار. ول ءبىر كاسىپورىندا 40 جىلدان بەرى ەڭبەك ەتىپ كەلەدى، دەپ حابارلايدى قازاقپارات ءتىلشىسى.
ءىس- شارا، ۇيىمداستىرۋشىلاردىڭ ايتۋىنشا، «شىن جۇرەكتەن» جوباسىنىڭ اياسىندا ءوتتى. سولتۇستىك قازاقستان وبلىسى ارداگەرلەر كەڭەسى بۇل جولى ەڭبەگىمەن ەرەكشەلەنگەن بەس اۋداننىڭ جانە پەتروپاۆلدىڭ 7 ەڭبەك ارداگەرىن قۇرمەتكە بولەدى.
سولاردىڭ ءبىرى - «پروگرەسس» تىگىن فابريكاسىنىڭ تەحنولوگى رايحان ساعىندىقوۆا. ول بۇل كاسىپورىندا 40 جىل بويى ەڭبەك ەتىپ كەلەدى. وسى ارالىقتا تىگىن فابريكاسىنىڭ بىرنەشە رەت اتاۋى وزگەردى، باسشىلارى مەن يەلەرى اۋىستى. قيىن توقسانىنشى جىلدارى دا رايحان سۇلەيمەن قىزى ءوز كاسىبىنە ادال بولىپ، ماماندىعىن اۋىستىرمادى.
«2000 -جىلداردىڭ باسى ءبىزدىڭ كاسىپورىن ءۇشىن اسا قيىن بولدى. ەڭبەكاقىنى ازىق- تۇلىكپەن بەردى. سول جىلدارى كوبى باسقا جۇمىسقا كەتتى، فابريكادا 6 ادام عانا قالدىق. ءبىز ونىڭ وتپەلى كەزەڭ ەكەنىنە، ۋاقىت وتە كەلە جاعدايدىڭ جاقساراتىنىنا سەندىك، سۇيىكتى ىسىمىزبەن اينالىسا بەردىك»، - دەيدى رايحان ساعىندىقوۆا.
قازىر بىلىكتى مامان تاجىريبەلىك سەحتى باسقارادى. قول استىنداعى ماماندارمەن جاڭا كيىم ۇلگىلەرىن ازىرلەپ، بۇرىننان بارىن جەتىلدىرەدى. سونداي- اق وندىرىسكە دە جاۋاپ بەرەدى. ونىڭ قاراماعىندا 50 تىگىنشى بار.
«بۇل ماماندىققا جاستار كوبىرەك كەلسە ەكەن دەگەن تىلەگىم بار. قازىر قىز- كەلىنشەكتەر ءساندى ماماندىقتاردى تاڭدايدى. ءبىراق، قول ەڭبەگى قاشان دا جوعارى باعالانعانىن ۇمىتپاۋ قاجەت. سوندىقتان بىزگە جۇمىسقا شاقىرامىن. تىگۋ بىلمەسە - ۇيرەتەمىز، تەك ىنتا بولسا بولعانى. ەڭبەكاقى جامان ەمەس، وسى ايدا تاعى دا ءوستى»، - دەيدى تىگىن فابريكاسىنىڭ تەحنولوگى.
«مەن ەڭبەگىممەن ماقتانامىن» اتتى سالتاناتتى ءىس- شارا بارىسىندا رايحان سۇلەيمەن قىزىنىڭ ەڭبەگى كوپكە ۇلگى ەتىلدى. وعان جانە سالتاناتتى جيىنعا قاتىسقان باسقا دا ەڭبەك ارداگەرلەرىنە سىيلىقتار تابىس ەتىلدى. كەش كونسەرتتىك باعدارلاماعا ۇلاستى.