تۇرمەدەن قاشقان 40 قىلمىسكەرگە جالعىز توتەپ بەرگەن قازاق باتىرىن بىلەسىز بە؟
حالىق اراسىنان شىققان باتىرلار تۋرالى كينولارى دا جەتىپ ارتىلادى. بۇل - كوپ ەلدە اسا دامىماعان ءۇردىس. ال ەندى وزىمىزگە ورالساق.
قازىر كوبى «بۇرىنعى قازاق قانداي ەدى»، «اتالارىمىز باتىر بولعان»، «جىگىتتەر مايدالانعان»، «جاستاردا جۇرەك جوق» دەپ ءجيى ايتادى. ءيا، بۇل پىكىرلەرمەن كەلىسپەۋگە بولماس. ءبىراق اتى تانىلماي قالعان قازىرگى زامان باتىرلارىن ءبىرى بىلسە، ءبىرى بىلمەيدى. قىزىقپايدى. وسىعان بايلانىستى Bugin.kz ءتىلشىسى 13 جىل بۇرىن بولعان وقيعاعا ءۇڭىلىپ كوردى.
2010-جىلدىڭ 22- ماۋسىمىندا اقتاۋ قالاسىندا ورنالاسقان قاتاڭ رەجيمدەگى كولونيادان 21 تۇتقىن قاشىپ شىعادى. تەرىس اعىمدى ۇستانعان ولاردىڭ جولىنا ءبىر عانا سارباز بوگەت بولدى. نەگىزى قىرىققا جۋىق ادام قاشپاق بولعان ەكەن، قاراۋىلدا تۇرعان ەربول وتاربايەۆ ەسىمدى 19 جاستاعى جىگىت قىلمىسكەرلەردىڭ بەتىن قايتارعان.
قاندى وقيعا بولعان كۇندى باتىر ەشقاشان ۇمىتپايتىنىن جاسىرمادى.
بۇل كۇندى ەشقاشان ۇمىتپايمىن. بارلىعى 2010-جىلدىڭ 21- ماۋسىمىندا بولدى. وڭتۇستىك قازاقستاننىڭ قازىعۇرت اۋىلىنان كەلگەن جىگىتتى اقتاۋ اسكەري بولىمشەسىنە شاقىردى. ءبىز قاتاڭ رەجيمدەگى كولونيانى كۇزەتەتىن بولدىق. ءارقايسىمىزعا ءۇش ساعاتتان كەزەكشىلىك ەتۋ كەرەك بولدى. مەن التىنشى پوستتا بولدىم، كەزەكشىلىك ۋاقىتىم 18:00 دەن 21:00 گە دەيىن جانە 3:00 دەن 6:00 گە دەيىن بولدى. تاڭەرتەڭگى نامازدى وقىعاننان كەيىن، ساعات 4:00 مەن 6:00 ارالىعىندا كولونيادا ترانسفورماتور جانىپ، بۇكىل جارىق ءسونىپ قالدى. وسى كەزدە تۇتقىندار ماعان قاراي جۇگىرىپ، وق جاۋدىرا باستادى. مەن دە قارۋ الىپ، وق جاۋدىرۋدى باستادىم. بىرەۋى قۇلادى. ءبىر كەزدە مەن تورعا تاپ بولدىم، ەكىنشى وقجاتاردى الىپ، اتۋدى باستادىم دا تاعى ءبىر تۇتقىندى جاراقاتتادىم. سول قولىما وق ءتيدى. قارا كيىمدى ادامداردىڭ ماعان قاراي جۇگىرىپ كەلە جاتقانى ەسىمدە، تۇتقىندار دەپ توپشىلادىم. جاراقاتتانسام دا، شامام كەلگەنشە ارەكەت جاساپ التىنشى پوستتان الىستاي باستادىم. قاشقىندار مەنى قورشاۋعا تىرىستى. قۇلادىم، مۇرنىمنان قان كەتتى. سودان كەيىن مەنى قاراۋىل باستىعى كوتەردى. ول قانشا ادام بولعانىن جانە قاي باعىتقا قاشىپ كەتكەنىن سۇرادى. قاشىپ كەتكەندەردىڭ ناقتى سانىن بىلمەدىم ءبىراق كوپ دەپ جاۋاپ بەردىم، سونىمەن قاتار ولاردىڭ قاي باعىتتا قاشىپ كەتكەنىن كورسەتتىم. سول ساتتە ءولىم قۇشامىن دەگەن وي كەلدى. جەدەل جاردەم كولىگى بولسا 20-30 مينۋتتان كەيىن عانا كەلىپ، مەنى اۋرۋحاناعا جەتكىزدى، - دەپ ەسكە الادى وتاربايەۆ.
2018-جىلى «التىنشى بەكەت» فيلمى قالىڭ كورەرمەنگە جول تارتتى. كارتينادا بالا كەزدەن دوس بولعان ەكى جىگىتتىڭ ءومىر جولى ەكى بولىنگەنىن كورەسىز. ەربول اسكەرگە اتتانادى. دوسى بولسا ەربولدىڭ سۇيگەن قىزىن بايقاۋسىزدا ءولتىرىپ قويادى. كوگىلدىر ەكراننان كورسەڭىز، وڭاي ەمەس. سيۋجەتتىڭ شەبەر جازىلعانى سول ەكەن، بىرنەشە جىلعا سوتتالعان دوسى ءدال ەربول بورىشىن وتەپ جۇرگەن ايماققا تاپ بولادى. ءبىر جەردە ەكى ءتۇرلى ءومىر: ءبىرى ادام ءومىرىن قيعان - قىلمىسكەر، ەكىنشىسى ءتۇن تىنىشتىعىن كۇزەتكەن - سارباز. بالالىق شاقتارى بىرگەن وتكەن جاقىن دوستار ەدى.
ءارى قاراي جوعارىدا كەيىپكەردىڭ ءوزى ايتقانداي شيەلەنىسۋ باستالادى. بىرنەشە ادام وققا ۇشتى. قاشىپ قۇتىلماقشى بولعان 21 ادامنىڭ ون بەسى ۇستاۋ بارىسىندا قازا تاپقان.
پرەزيدەنت جارلىعىمەن جاۋىنگەرلىك قىزمەتتى اتقارۋ كەزىندەگى باتىلدىعى مەن ەرلىگى ءۇشىن ول Ⅲ دارەجەلى «ايبىن» وردەنىمەن ماراپاتتالدى. قازىر ول 33 جاستا.
