سولتۇستىك قازاقستان دا 40- گرادۋسقا دەيىن اياز بولادى
وسىعان وراي قۇتقارۋشىلار الدىن الا س م س- حابارلامالار جىبەرىپ، وقىس وقيعالاردىڭ الدىن الۋ ءۇشىن ءبىرقاتار شارانى قولعا الدى، دەپ حابارلايدى قازاقپارات ءتىلشىسى.
س ق و توتەنشە جاعدايلار دەپارتامەنتى باستىعىنىڭ ورىنباسارى مۇرات قانعوجينوۆتىڭ ايتۋىنشا، كەلەسى اپتادا تاعى دا كۇن بۇزىلىپ، بۇل جولى كۇن كۇرت سۋىتپاق. كۇندىز سىناپ باعاناسى 30-35- گرادۋسقا دەيىن، تۇندە كەي جەرلەردە 40- گرادۋسقا تومەندەمەك.
«قازىر ءبىلىم باسقارماسىمەن بىرگە جۇمىس ىستەپ جاتىرمىز، مۇنداي اياز بولعان جاعدايدا مەكتەپتەردە ساباق بولمايدى. سونداي-اق اۋدانداردىڭ اكىمدىكتەرىمەن، پوليتسيامەن دە بايلانىس ورناتتىق. اۆتوجولداردا قوزعالىستى شەكتەۋدى ۇسىندىق. وبلىس اۋماعىنان سولتۇستىك انتيتسيكلونى وتپەك، سايكەسىنشە ءبىر اپتا بويى اياز تۇرادى.
اۆتوبۋستار، جۇك كولىكتەرى ارزان باعاسىنا قىزىعىپ كەيدە جازعى ديزەل وتىنىن قولدانادى. ال ول قاتتى سۋىققا شىداس بەرمەي قاتىپ، سالدارىنان كولىك جولدا قالادى. بۇل - وتە قاۋىپتى. وزبەكستان ازاماتتارى مىنگەن اۆتوبۋستار دا وبلىس اۋماعىنان وتەدى. تاجىريبە كورسەتكەندەي، ادەتتە ولار جازعى دوڭگەلەكپەن جانە جازعى ديزەل وتىنىمەن جۇرەدى. سوندىقتان بۇل كولىك جۇرگىزۋشىلەرى دە نازاردان تىس قالمايدى»، - دەيدى مۇرات قانعوجينوۆ.
بيىل رەسپۋبليكالىق، وبلىستىق ماڭىزى بار جول بويىندا 300 جىلىتۋ بەكەتى قۇرىلدى. قازىر ولاردىڭ دايىندىعى پىسىقتالىپ جاتىر. بۇل بەكەتتەردە جىلىتۋ قۇرالدارى، ىستىق تاماق بولۋى كەرەك.
«قاتتى ايازدىڭ كەلۋىنە بايلانىستى وبلىس تۇرعىندارى مەن قوناقتارىن قاۋىپسىزدىك شارالارىن ۇستانۋعا شاقىرامىز. مۇمكىندىگىنشە الىس جولعا شىقپاۋ، شىققان جاعدايدا وزدەرىڭىزبەن بىرگە بالا مەن قارت ادامداردى الماعان ءجون، تۋعان-تۋىسقا قايدا جول جۇرگەنىڭىزدى ايتىپ كەتۋ كەرەك.
بيىلدان باستاپ جولدارعا شەكتەۋ ەنگىزىلگەنىنە قاراماستان جولعا شىققاندارعا جاۋاپكەرشىلىك بار. ءبىرىنشى جولى 30 ا ە ك - 103 مىڭ تەڭگە ايىپپۇل سالىنسا، قايتالانعان جاعدايدا 15 تاۋلىككە دەيىن قاماۋعا الىنادى. قازىر بۇل ماسەلەنى جەرگىلىكتى پوليتسيا قىزمەتى قاراستىرىپ جاتىر»، - دەيدى ۆەدومستۆو باستىعىنىڭ ورىنباسارى.
قىس باستالعالى س ق و- دا 36 رەت اۋا رايىنا بايلانىستى ەسكەرتۋ جاريالاندى. 6 رەت كولىك جولدا قالدى. 44 ادام، سونىڭ ىشىندە ءبىر بالا قار قۇرساۋىنان شىعارىلدى. عابيت مۇسىرەپوۆ اۋدانىندا تۇركيا ازاماتى جىلىتۋ بەكەتىنە ورنالاستىرىلدى. تايىنشا اۋدانى كەللەروۆكا ەلدى مەكەنىندە رەسەي ازاماتتارى مىنگەن اۆتوبۋس اۋا رايىنا بايلانىستى توقتاپ، كۇن اشىلعاننان كەيىن عانا جولىن جالعادى.
ال جىل باستالعالى س ق و- نىڭ وڭتۇستىگىندە - ايىرتاۋ مەن اقجار اۋداندارىندا بورانعا بايلانىستى جولداردى جابۋعا تۋرا كەلدى.
