قازاقستاننىڭ سىرتقى قارىز ۇلەسى 40 پايىزعا ازايدى - ناتاليا گودۋنوۆا

بۇل تۋرالى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعاسى ناتاليا گودۋنوۆا پارلامەنتتىڭ بىرلەسكەن وتىرىسىندا ايتتى، دەپ حابارلايدى قازاقپارات ءتىلشىسى.

«مەملەكەتتىك بورىشتىڭ جالپى ىشكى ونىمگە قاتىناسى جاڭا بيۋدجەتتىك ساياساتتىڭ تۇجىرىمداماسىندا كورسەتىلگەن 27 پايىزدىق مەجەدەن ءسال استى. ەسەپتى كەزەڭدە ۇكىمەت بورىشىنىڭ قۇرىلىمى جاقساردى. ىشكى قارىزدىڭ ۇلەسى 60 پايىزعا دەيىن ءوسىپ، سىرتقى قارىزدىڭ ۇلەسى 40 پايىزعا دەيىن ازايدى. دەگەنمەن، بىلتىر سىرتتان العان قارىز مولشەرىنىڭ 4 ەسە ارتۋى - ايتارلىقتاي سىن- قاتەر»، - دەدى كوميتەت باسشىسى.

ونىڭ ايتۋىنشا، سىرتقى قارىزدى اقىلعا قونىمسىز تارتىپ، قولدانۋ ارەكەتى ءۇشىن جەكە جاۋاپكەرشىلىك ەنگىزۋ شارالارى دا قولعا الىنا باستاعان.

«ونداي تۇزەتۋلەردىڭ ءبىر بولىگى ازىرلەنىپ، سەناتتىڭ قاراۋىنا جولداندى. قالعان تۇزەتۋلەر بويىنشا جۇمىستى پارلامەنتتىڭ كۇزگى سەسسياسىندا اياقتاۋدى جوسپارلاپ وتىرمىز. وسىلارمەن بىرگە مەملەكەت بورىشىنىڭ قاۋىپسىز شەگىن اشىق ەسەپتەۋ جانە سىرتتان الىنعان بورىشتىڭ ءتيىمدى يگەرىلۋىنە تالداۋ جاساۋ تەتىكتەرىن ەنگىزۋ قاجەت»، - دەدى ناتاليا گودۋنوۆا.

قازىرگى كەزدە مەملەكەت قارىزى قاۋىپسىز دەڭگەيدە ساقتالىپ وتىر. بۇل تۋرالى پارلامەنت پالاتالارىنىڭ بىرلەسكەن وتىرىسىندا 2021 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتى قاراۋ كەزىندە پرەمەر- ءمينيستردىڭ ورىنباسارى- قارجى ءمينيسترى ەرۇلان جاماۋبايەۆ ءمالىم ەتتى.

«مەملەكەت قارىزىنىڭ ءوسۋى رەسپۋبليكالىق بيۋدجەت تاپشىلىعىن جابۋ قاجەتتىلىگىمەن جانە ماڭىزدى الەۋمەتتىك جوبالاردى قارجىلاندىرۋ ءۇشىن قارىز الۋمەن بايلانىستى بولدى. بىلتىرعى جىلدىڭ قورىتىندىلارى بويىنشا مەملەكەت بورىشىنىڭ دەڭگەيى جالپى ىشكى ونىمگە شاققاندا 27,4 پايىزدى قۇرادى جانە بۇگىنگى تاڭدا قاۋىپسىز دەڭگەيدە ساقتالىپ وتىر»، - دەدى ە. جاماۋبايەۆ.

وسى ورايدا ول بۇل كورسەتكىش حالىقارالىق قارجى جانە رەيتينگتىك ۇيىمداردىڭ باعالاۋلارىمەن دە راستالعانىن جەتكىزدى.

«دەگەنمەن، مەملەكەت قارىزىن باسقارۋدى ودان ءارى جەتىلدىرۋ ءۇشىن كەلەسىدەي شارالار قابىلدانادى. بىرىنشىدەن، بيۋدجەت تاپشىلىعى كەزەڭ- كەزەڭىمەن ازاياتىن بولادى. بۇل بورىشتىڭ ءوسۋ قارقىنىن تومەندەتۋگە ىقپال ەتەدى. ەكىنشىدەن، كولەڭكەلى ەكونوميكامەن كۇرەستى بەلسەندى تۇردە جالعاستىرامىز. وسى ورايدا اكىمشىلەندىرۋدى جاقسارتۋ جانە سيفرلاندىرۋ ارقىلى سالىق تۇسىمدەرى بىرتىندەپ ۇلعايتىلادى»، - دەدى ۇكىمەت باسشىسىنىڭ ورىنباسارى.

بۇدان باسقا، زاڭنامادا سىرتقى قارىز قاراجاتىن ۋاقتىلى يگەرمەگەنى ءۇشىن مەملەكەتتىك ورگاننىڭ ءبىرىنشى باسشىسىنىڭ جاۋاپكەرشىلىگىن بەلگىلەۋ جونىندە نورما قابىلدانعانىن اتاپ ءوتۋ كەرەك. «جالپى، ۇكىمەت جۇيەلى تۇردە مەملەكەتتىك جانە مەملەكەت كەپىلدىك بەرگەن بورىشتىڭ، سونداي- اق كۆازيمەملەكەتتىك سەكتور بورىشىنىڭ قالىپتاستىرىلۋىنا جانە باسقارىلۋىنا باقىلاۋدى كۇشەيتەتىن بولادى. وسى تۇرعىدا 2030 -جىلدارعا دەيىن مەملەكەتتىك قارجىنى باسقارۋ كونتسەپتسياسى قابىلداناتىن بولادى»، - دەدى ول.

اۆتور: ەسىمجان ناقتىباي