«بولاشاق» باعدارلاماسىنىڭ تىزىمىنە 40 جاڭا ماماندىق قوسىلدى
بۇل تۋرالى «حالىقارالىق باعدارلامالار ورتالىعى» ا ق باسقارما ءتوراعاسى ءانۋار جانعوزين جەلىدەگى پاراقشاسىندا جازدى، دەپ حابارلايدى قازاقپارات.
ءتىزىم يننوۆاتسيالار، جاڭا تەحنولوگيالار، مەديتسينا جانە يندۋستريالىق ينجەنەريا، جاراتىلىستانۋ عىلىمدارى سالاسى بويىنشا تولىقتىرىلدى.
«17 ماماندىقتىڭ اتاۋى كەڭەيتىلىپ، بۇرىننان بار ماماندىقتار قاتارىنا قوسىلسا، 23 ءى جاڭا ماماندىق رەتىندە ەنگىزىلىپ وتىر. جالپى العاندا، باسىم ماماندىقتاردىڭ ءتىزىمى تەحنيكالىق باعىتتاعى ماماندىقتارمەن %30 عا كەڭەيتىلدى»، - دەيدى ءانۋار جانعوزين.
ورتالىق باسىم ماماندىقتاردى انىقتاۋ ءۇشىن مەملەكەتتىك ورگاندار مەن ۇيىمداردىڭ جوعارى جانە جوعارى وقۋ ورنىنان كەيىنگى ءبىلىمى بار كادرلار قاجەتتىلىگىنە قاتىستى 70 كە جۋىق وتىنىمىنە تالداۋ جاساعان.
«كادرلىق نارىقتىڭ ورتا مەرزىمدى بولجامى ەسكەرىلدى. مەملەكەتتىك ورگاندار، جوو، عىلىمي ورتالىقتار، يندۋستريا جانە بيزنەس وكىلدەرىنىڭ قاتىسۋىمەن ساراپتامالىق كەزدەسۋلەر وتكىزدىك»، - دەپ جازادى ول.
بيىلعى جىلى شەتەلدىك جوعارى وقۋ ورىندارىندا ءبىلىم الۋعا ارنالعان باسىم ماماندىقتار تىزىمىنە جالپى اكادەميالىق وقۋ بويىنشا 92 ماماندىق جانە تاعىلىمدامادان وتۋگە 158 ماماندىق كىردى.
ءتىزىمدى «حالىقارالىق باعدارلامالار ورتالىعى» ا ق رەسمي سايتىنان قاراۋعا بولادى. بۇعان دەيىن «بولاشاق» باعدارلاماسىنا الەمنىڭ ۇزدىك 23 تەحنيكالىق ۋنيۆەرسيتەتى كىرگەن بولاتىن.
