ۋكراينانىڭ حاركوۆ قالاسىنان قازاقستاندىق 40 ستۋدەنت ەۆاكۋاتسيالانۋدا
بۇل تۋرالى قازاقستاننىڭ ۋكرايناداعى ەلشىسى دارحان كالەتايەۆ ءمالىم ەتتى، دەپ حابارلايدى قازاقپارات ءتىلشىسى.
«حاركوۆتەن قازاقستاندىق 40 ستۋدەنت حابارلاستى. وندا نە بولىپ جاتقانىن بىلەسىز بە؟ ناعىز اتىس- شابىس. ستۋدەنتتەر ماعان حابارلاسىپ، اتىس ءجۇرىپ، بومبا جارىلىپ جاتىر، قورقىنىشتى دەيدى. ولاردى قۇتقارۋدىڭ 2 امالى بولدى. ءبىرى سونداعى كونسۋلدىقتىڭ جەرتولەسىندە ۇستاي تۇرۋ، ەكىنشى جولى حاركوۆتەن لۆوۆقا پوەزبەن جەتكىزۋ. ءبىز ەكىنشى جولدى تاڭدادىق، قازىر ستۋدەنتتەر ۆوكزالدا. جانە سۋمى قالاسىندا 2 ازاماتىمىز بار»، - دەدى دارحان كالەتايەۆ.
سونداي- اق، ەلشى ازاماتتاردى ەۆاكۋاتسيالاۋدا كولىك باعاسىنىڭ ءوسىپ كەتكەنىن ايتتى.
«كيەۆتەن پولشا شەكاراسىنا جەتكىزۋ ءۇشىن 15-20 مىڭ دوللار سۇرايدى. بىزدە ەلشىلىكتە ونداي كولەمدەگى قاراجات جوق. ونىڭ ۇستىنە قارجى اۋدارىلىمدارى جۇمىس ىستەمەيدى»، - دەيدى ول.
بۇعان دەيىن دارحان كالەتايەۆ ۋكراينا شەكاراسىندا قازاقستاندىقتار مىنگەن 4 اۆتوبۋستىڭ كەپتەلىستە تۇرعانىن ايتتى.