جاڭا ماكسيمۋم: رەسەيدە ءبىر تاۋلىكتە 40 مىڭ ادامنان كوروناۆيرۋس تابىلدى
بۇل - پاندەميا باستالعالى تىركەلگەن جاڭا ماكسيمۋم. بۇل تۋرالى سەنبى كۇنى جاڭا ينفەكسيامەن كۇرەس جونىندەگى فەدەرالدى جەدەل شتاب ءمالىم ەتتى، دەپ حابارلايدى قازاقپارات تاسس اگەنتتىگىنە سىلتەمە جاساپ.
سالىستىرمالى تۇردە اۋرۋعا شالدىعۋشىلار سانىنىڭ ءوسىمى %0,48 قۇرادى. پاندەميا باستالعاننان بەرى بارلىعى 8472797 ادام كوروناۆيرۋس جۇقتىرعان. قازىرگى ۋاقىتتا ەمدەلىپ جاتقان پاتسيەنتتەر سانى پاندەميا باستالعاننان بەرى العاش رەت 900000-نان استى.
شتاب مالىمەتىنشە، قازىر رەسەيدە 903993 ادام اۋىرىپ جاتىر. كوروناۆيرۋستان كەيىن ەمدەلگەن رەسەيلىكتەردىڭ سانى ءبىر كۇندە 28909-عا ءوستى. بارلىعى 7331424 ادام ساۋىعىپ شىققان. اۋرۋحانادان شىعارىلعان پاتسيەنتتەردىڭ ۇلەسى اۋرۋ جۇقتىرعانداردىڭ جالپى سانىنىڭ %86,5 دەڭگەيىندە قالعان. كوروناۆيرۋستان بولعان ءولىم جاعدايلارىنىڭ سانى ءبىر كۇندە 1160-قا ارتقان، اۋرۋدان كوز جۇمعانداردىڭ جالپى سانى 237380-گە دەيىن ءوستى.
اۆتور: اياۋلىم التىنبەك