شاحمات: جىگىتتەر - 40-ورىندا، قىزدار - العاشقى وندىقتا
بۇل سۇراققا ورتالىق كوممۋنيكاتسيالار قىزمەتىندە وتكەن بريفينگ كەزىندە قازاقستان شاحمات فەدەراتسياسىنىڭ اتقارۋشى ديرەكتورى ءانۋار ەسماعامبەتوۆ جاۋاپ بەردى، دەپ حابارلايدى قازاقپارات ءتىلشىسى.
«ەرلەر مەن ايەلدەر اراسىندا كورسەتكىشتەر بويىنشا ايىرماشىلىق بار. ەرلەر قۇراماسى 40-ورىندا بولسا، ايەلدەر قۇراماسى - ۇزدىك وندىقتا. وكىنىشكە قاراي، بالالار اراسىندا مۇنداي كورسەتكىش جوق. ءبىراق مەن ەلىمىزدە شاحماتشىلاردىڭ جاقسى بۋىنى ءوسىپ كەلە جاتقانىن ايتا الامىن. ءبىزدىڭ شاحماتشى بالالار الەم چەمپيوناتتارىنان مەدالسىز ورالىپ كورگەن جوق»، - دەدى ءانۋار ەسماعامبەتوۆ.
سونداي-اق، ول قازاقستاننىڭ شاحمات فەدەراتسياسى ەل قورجىنىنا ەڭ كوپ مەدال سالاتىن جەتەكشى فەدەراتسيالاردىڭ ءبىرى ەكەنىن جەتكىزدى.
«مىسالى، 2019-جىلى شاحماتتان رەسمي الەم چەمپيوناتتارى مەن بالالار اراسىنداعى تىكەلەي تۋرنيرلەرگە شەكتەۋ بولماي تۇرعان كەزدە قازاقستان قۇراماسى مەدالدار سانى بويىنشا ءۇشىنشى ورىنعا يە بولعان ەدى. قازاقستانمەن ءبارى ساناسادى. وقۋ-جاتتىعۋ جيىندارىن وتكىزىپ، شاحماتشىلاردى شاكىرتاقىمەن ىنتالاندىرىپ وتىرۋ ءۇشىن، جاقسى مامانداردى شاقىرتىپ، ويىنشىلاردىڭ دەڭگەيىن كوتەرۋ ءۇشىن قولداۋ مەن قاراجات كەرەك ەكەنىن قايتالاپ ايتقىم كەلەدى»، - دەدى فەدەراتسيا باسشىسى.
بۇعان دەيىن حابارلاعانىمىزداي، مەملەكەت باسشىسى قاسىم-جومارت توقايەۆ جانسايا ابدىمالىكتى فيدە گران-پريىندەگى جەڭىسىمەن قۇتتىقتاعان بولاتىن.
ەسكە سالساق، اتالمىش تۋرنيردەگى جەتىستىگى ءۇشىن وتانداسىمىز ەرلەر اراسىنداعى حالىقارالىق گروسسمەيستەر اتانعان ەدى.
