زاڭسىز بالىق اۋلاۋدان قازاقستان بيۋدجەتى 40 ميلليارد تەڭگەدەن قاعىلىپ وتىر

نۇر- سۇلتان. قازاقپارات - بالىق سالاسىنداعى وتكىر پروبلەما - بالىق ونىمدەرىنىڭ كولەڭكەلى اينالىمى. ماسەلە جايلى ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ كەڭىنەن ايتىپ بەردى، دەپ حابارلايدى قازاقپارات ءتىلشىسى.

«ەكونوميكادا بالىق شارۋاشىلىعى ماڭىزدى ءرول اتقارادى. بىلتىر 45 مىڭ توننا بالىق اۋلاندى. بۇل 2018 -جىلعى دەڭگەيدەن 23 پايىزعا جوعارى. سالادا 11 مىڭ ادام جۇمىس ىستەيدى. ەلىمىزدە بالىق وسىرۋمەن 180 بالىق شارۋاشىلىعى اينالىسادى. وندا 1 مىڭنان استام (1126) ادام جۇمىس ىستەيدى. تاۋارلىق بالىق ءوسىرۋ كولەمىنىڭ ءوسىمى بايقالادى. بىلتىر 6,9 مىڭ توننا بالىق وسىرسە، بۇل 2018 -جىلعى دەڭگەيدەن 19 پايىزعا جوعارى. وسى جىلعا جوسپار - 7,8 مىڭ توننا»، - دەدى ماعزۇم مىرزاعاليەۆ بۇگىن ورتالىق كوممۋنيكاتسيالار قىزمەتىندە وتكەن حالىققا ونلاين ەسەپ بەرۋ بارىسىندا.

مينيستر وتكەن جىلى بالىقتى قايتا وڭدەۋ ناتيجەسىندە جالپى سوماسى 60 ميلليون ا ق ش دوللارى بولاتىن 30 مىڭ توننا ءونىم ەكسپورتتالعانىن، بۇل 2018 -جىلعى دەڭگەيدەن 16,6 پايىزعا ارتىق ەكەنىن ءمالىم ەتتى.

«بالىق سالاسىنداعى وتكىر پروبلەما - بالىق ونىمدەرىنىڭ كولەڭكەلى اينالىمى. ول بالىق ءوندىرۋدىڭ ورتاشا جىلدىق كولەمىنەن 5 ەسە ارتىق. بالىق اينالىمىنىڭ بارلىق پروتسەسىن سيفرلاۋ قاجەت. بالىق شارۋاشىلىعىن كولەڭكەدەن شىعارۋ سالىق سالۋ بازاسىن 40 ميلليارد تەڭگەگە ارتتىرادى. كاسپي تەڭىزىنىڭ رەسۋرستارىن يگەرۋ ەسەبىنەن وتاندىق نارىق كولەمىن 66-دان 120 مىڭ تونناعا، بالىق اۋلاۋ 45-تەن 60 مىڭ تونناعا، ال بالىق ءوسىرۋ 7-دەن 60 مىڭ تونناعا دەيىن ۇلعايتۋدىڭ جوعارى الەۋەتى بار»، - دەدى ول.

وسىعان بايلانىستى قازىرگى ۋاقىتتا مينيسترلىك بالىق سالاسىن ۇزاقمەرزىمدى دامىتۋ ءۇشىن ينۆەستيتسيالار تارتۋعا جانە جۇمىس ورىندارىن قۇرۋعا ىقپال ەتەتىن سالانى سۋبسيديالاۋ بويىنشا ءبىرقاتار زاڭنامالىق شارالاردى پىسىقتاپ جاتىر.

اۆتور: ايان بەكەن ۇلى