قازاق كۇرەسىنەن الەم چەمپيوناتىنا 40-تان اسا ەلدىڭ پالۋاندارى قاتىسادى
الەم چەمپيوناتىنا 40-تان اسا ەلدىڭ سپورتشىلارى قاتىسادى. ولاردىڭ قاتارىندا: ۋكراينا، گرۋزيا، اۆستريا، نورۆەگيا، ەستونيا، فرانسيا، يرلانديا، گەرمانيا، پاكىستان، وزبەكستان، يران، ۇلى بريتانيا، قىرعىزستان، ءۇندىستان، ليتۆا، سلوۆەنيا، رەسەي جانە ت. ب. بار.
پالۋاندار 8 سالماق دارەجەسىندە بەلدەسەتىن بولادى.
چەمپيوناتتا ۋكراينا، رەسەي، قىرعىزستان، تاجىكستان، گرۋزيا، ليتۆا جانە ارمەنيا مەملەكەتتەرىنەن كەلگەن – 8، ەلىمىزدەن 12 قازىلىق ەتەتىن تورەشى بولادى.
Qazaq Kuresi حالىقارالىق فەدەراتسياسى ۇيىمداستىرعان چەمپيوناتتار تاريحىندا العاش رەت تورەشىلەر قۇرامىنا قىرعىزستاننان كەلگەن ايەل تورەشى قوسىلدى.
جارىستىڭ باس تورەشىسى رەتىندە - حالىقارالىق دارەجەدەگى قازاقستان رەسپۋبليكاسىنىڭ سپورت شەبەرى، قازاقستان رەسپۋبليكاسىنىڭ ەڭبەك سىڭىرگەن باپكەرى، PhD دوكتورى ەربول مىرزابوسىنوۆ تاعايىندالدى.
اتاپ وتەر جايت، چەمپيوناتتا سپورت التىن، كۇمىس، قولا مەدالداردان بولەك، ۇزدىك تەحنيكا، ادەمى ءادىس جانە تاعى باسقا تەحنيكاسىمەن ەرەكشەلەنگەن سپورتشىلار ماراپاتتالادى. سونداي- اق، چەمپيونات اياسىندا تورەشىلەر سەمينارى وتكىزىلەدى. ادەتتەگىدەي سەمينار بارىسىندا Qazaq Kuresi تورەشىلىك تۇرعىسىندا تالقىلانادى.
2019 -جىلعى الەم چەمپيوناتى سيمۆولدارىنىڭ ءبىرى - وليمپيادا الاۋى. ول چەمپيونات وتەتىن اقتوبە قالاسىنىڭ بەلگىسى اتانعان - قىزعالداقپەن ارلەندى. قازاقستاننىڭ باتىس ءوڭىرى مۇناي جانە گاز كەن ورىندارىنا باي. سوندىقتان سيمۆولداردىڭ ەكىنشى تۇسىندىرمەسى - وتتى قىزعالداق. لوگوتيپتىڭ دوڭگەلەك فورماسى شارانىڭ حالىقارالىق، جاھاندىق مارتەبەسىن كورسەتە وتىرىپ، جەر شارىنىڭ بەينەسىن بىلدىرەدى. قىزىل، سارى جانە كوك تۇستەر كۇرەس كۇرەسىنەن جارىستار وتەتىن تاتاميگە تۇسىنە سايكەستەندىرىلدى. بۇل تۇستەر لوگوتيپ كودىنىڭ نەگىزى.
