پەتروپاۆلدا 40 ميلليون تەڭگەگە ساتىپ الىنعان اۆتوبۋس تەستىلەۋدەن ءوتتى
سولاردىڭ ءبىرى بۇگىن قالا كوشەلەرىندە تەستىلەۋدەن وتكىزىلدى، دەپ حابارلايدى قازاقپارات ءتىلشىسى.
س ق و اۆتوكولىك قوعامىنىڭ مالىمەتىنشە، قازىرگى تاڭدا پەتروپاۆلدا جولاۋشىلاردى كۇندەلىكتى 270 اۆتوبۋس 24 باعىت بويىنشا تاسىمالدايدى. الايدا ولاردىڭ باسىم بولىگى ەسكىرگەن. بۇل ماسەلەنى شەشۋ ءۇشىن پەتروپاۆل قالاسىنا 40 اۆتوبۋس ساتىپ الىنادى.
«ماۋسىم ايىندا پاۆلوۆ زاۋىتىنان مۇمكىندىگى شەكتەۋلى جاندارعا قولايلى، پاندۋس ورناتىلعان 4 اۆتوبۋس ساتىپ الىنادى. قازىر «Golden Dragon» كومپانياسىنىڭ اۆتوبۋسى تەستىلەۋدەن وتەدى. كوڭىلدەن شىعىپ جاتسا - الامىز. ارينە، كولىكتىڭ ىڭعايلىلىعى، قالا كوشەلەرىندە ەمىن- ەركىن ءجۇرۋى ءۇشىن ۇزىندىعى ەسكەرىلەدى. ناتيجەسىندە قانشاسىن ساتىپ الىناتىنىمىزدى شەشەمىز. ازىرگە جوسپاردا 40 داناسىن الامىز دەگەن وي بار»، - دەيدى «س ق و اۆتوكولىك وداعى» بىرلەستىگىنىڭ ءتوراعاسى گالينا سەمەنوۆا.
«Golden Dragon» كومپانياسىنىڭ اۆتوبۋسى «ASTANA MOTORS» زاۋىتىندا قۇراستىرىلعان. باعاسى - 40 ميلليون تەڭگە. ۇزىندىعى - 11 مەتر، وتىراتىن 32 ورنى بار. قىستا جىلى، ال جاز مەزگىلىندە سالقىن بولماق. اۋا باپتاعىشى بار، تەگىن ينتەرنەتپەن جانە پاندۋسپەن جابدىقتالعان.
«بۇل كومپانيانىڭ ءۇش ءتۇرلى اۆتوبۋسى بار. ولار ۇزىندىعىمەن ءارى جابدىقتالۋىمەن ەرەكشەلەنەدى. بيىلدان باستاپ كولىكتەر الماتى قالاسىندا دا قۇراستىرىلا باستايدى»، - دەيدى كومپانيا وكىلى داۋرەن ەسەمبايەۆ.
جاڭا اۆتوبۋستى تەكسەرۋدەن وتكىزۋگە ءوڭىر باسشىسى قۇمار اقساقالوۆ قاتىسىپ، ءوز باعاسىن بەردى.
«اۆتوبۋستىڭ ساپالى ەكەنىن كوردىك. ءىشى كەڭ، ىڭعايلى. زاۋىت وكىلدەرى كولىكتىڭ قىستا جىلى بولاتىنىن ايتتى. اقىلداسىپ، شەشىم قابىلدايمىز. جاقىن ارادا 30-40 اۆتوبۋس الۋعا دايىنبىز»، - دەدى قۇمار اقساقالوۆ.
جاڭا كولىكتەر ءبىرىنشى كەزەكتە حالىق كوپ جۇرەتىن ورتالىق كوشەلەرگە جىبەرىلمەك.