الماتىعا كەلەتىن تۋريستەردىڭ 40 پايىزى - شەتەلدىكتەر
«2018 -جىلى الماتى قالالىق تۋريزم جانە سىرتقى بايلانىستار باسقارماسى تۋريستىك ينفراقۇرىلىمدى دامىتۋعا، تۋريستىك سالانىڭ كادرلىق الەۋەتىن ارتتىرۋعا 1 ميلليارد تەڭگە جۇمساعان. ونىڭ ىشىندە اۋەجاي مەن تاكسي، ۆوكزال قىزمەتكەرلەرىنە ارنايى ترەنينگ جۇرگىزىلدى. ولار كەلگەن قوناقتاردى كۇتىپ الىپ، ولارعا قىزمەت كورسەتۋگە ماشىقتاندى» ، - دەدى تۋريزم باسقارماسىنىڭ ءبولىم باسشىسى اسلان قوڭىرحانوۆ.
ونىڭ ايتۋىنشا، قازاقستانداعى تۋريزم اعىمىنىڭ بەستەن ءبىرى الماتىنىڭ ۇلەسىندە.
ولاردىڭ %40 شەتەلدىك تۋريستەر. كوبىنەسە رەسەي جانە قىتاي تۋريستەرى قازاقستانعا ءجيى ات ءىزىن سالادى.
«الماتىنىڭ ءيميدجىن قالىپتاستىرۋ ماسەلەسىنە كەلسەك، 2017-2018 -جىلدارى BBC، Euronews قىزمەتتەرىمەن جانە ەڭ ءىرى TripAdvisor تۋريستىك سايتپەن ارىپتەستىك جۇمىستارىن جۇرگىزدىك. قالادا 8 اقپاراتتىق دۇڭگىرشەك، Almaty Pass كارتاسى اشىلدى. كارتانى العان تۋريست الماتىداعى قوعامدىق كولىك مارشرۋتتارىن پايدالانىپ، كورنەكتى جەرلەرگە بارا الادى» ، - دەدى باسقارما وكىلى.
ونىڭ ايتۋىنشا، قالاداعى نىسانداردا QR- كود قويىلادى. وسى كود ارقىلى نىساننىڭ تاريحى تۋرالى اقپارات تىڭداۋعا مۇمكىندىك بەرىلگەن.
سونىمەن قاتار، بيىل بورالداي ساق قورعاندارىندا مۋزەي اشۋ، ۆوزنەسەن سوبورىن قايتا قالپىنا كەلتىرۋ، «ەتنولەند» ەتنومادەني كەشەنىن، رايىمبەك مەموريالدى كەشەنىن سالۋ كوزدەلگەن.
اكىمدىك ەكوتۋريزم باعىتىن دامىتۋدى دا قولعا الىپ وتىر. ونىڭ ۇستىنە، الماتى ماڭىندا ورنالاسقان حان ءتاڭىرى شىڭى، شارىن شاتقالى مەن كولساي كولىنىڭ الەۋەتتەرى جوعارى.
قازاقستان تۋريستىك قاۋىمداستىعىنىڭ ءتورايىمى راشيدا شايكەنوۆا ەۋروپالىق تۋريزم وداعى مەن قاۋىمداستىق اراسىندا ەڭ تارتىمدى ايماق - الماتى مەن الماتى وبلىسىندا ەكوتۋريزمدى دامىتۋ بويىنشا ۇلكەن جوبا جاسالىپ جاتقانىن ايتتى.
ونىڭ ايتۋىنشا، بىلتىر الماتىعا 700 ەكوتۋريست كەلگەن.