تىلدەر ونكۇندىگى: اقمولادا 40-قا جۋىق شارا وتكىزىلەدى
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق تىلدەردى دامىتۋ باسقارماسىنىڭ باسشىسى مارال جاقىپوۆا ايتتى، دەپ حابارلايدى قازاقپارات ءتىلشىسى.
«جىل سايىن وتكىزىلەتىن تىلدەر ونكۇندىگى بيىل قىركۇيەك ايىنىڭ 5-18 -كۇندەرى ارالىعىنا جوسپارلانىپ وتىر»، دەپ اتاپ ءوتتى م. جاقىپوۆا.
«قىركۇيەكتىڭ 5 ى كۇنى قازاقتىڭ ۇلتتىق قوعامدىق- ساياسي قايراتكەرى احمەت بايتۇرسىنوۆتىڭ تۋعان كۇنى. سول سەبەپتى جىل سايىن ءداستۇر بويىنشا وسى كۇنى تىلدەر ونكۇندىگى باستاۋ الادى. ونكۇندىك شەڭبەرىندە وبلىستا دوڭگەلەك ۇستەل، بايقاۋ، ادەبي- سازدى كەشتەر، شىعارما جانە سۋرەت بايقاۋلارى ءتارىزدى 40-قا جۋىق شارا وتكىزۋ جوسپاردا بار. جالپى، جىلدان جىلعا شارانىڭ اياسى كەڭەيىپ كەلەدى».
اتقارىلعان شارۋالار جانە الداعى جوسپارلارى تۋرالى قازاقستان حالقى اقمولا اسسامبلەياسى حاتشىلىعىنىڭ مەڭگەرۋشىسى رينات گالياموۆ ايتىپ بەردى. ونىڭ سوزىنشە، قازاق تىلىندە اشىق ديكتانت وتكىزۋ بويىنشا دايىندىق جۇمىستارى جۇرگىزىلۋدە. وعان كەز كەلگەن ادام قاتىسا الادى. سونداي-اق، وزگە ۇلت وكىلدەرى اراسىندا «تۋعان جەر» ءان بايقاۋى ۇيىمداستىرىلسا، كيەلى ورىندارىمەن تانىمال ەرەيمەنتاۋ جانە قورعالجىن اۋداندارىندا تاقىرىپتىق شارالار وتكىزۋ جوسپاردا بار.
