گولوۆكيننىڭ قازاقستانداعى جەكپە- جەگى 40 مىڭ ورىندىق فۋتبول الاڭىندا ءوتۋى مۇمكىن

بۇل تۋرالى Sports.kz-كە سىلتەپ، Stan.kz اقپاراتتىق اگەنتتىگى حابارلايدى.

2017 -جىلدىڭ جازىندا گولوۆكين استانادا ورتاشا سالماقتا WBO الەم چەمپيونى بيللي دجو سوندەرسپەن جەكپە- جەك وتكىزۋدى جوسپارلاعان بولاتىن. ءبىراق بوكسشىنىڭ ۋاقىتى تىعىز بولعاندىقتان، بۇل شارا ۇيىمداستىرىلماي قالدى.

 «وتكەن جىلى قازاقستانداعى ەكسپو كورمەسىنىڭ شەڭبەرىندە GGG جەكپە- جەگىن وتكىزۋگە بولار ەدى. ءبىراق گولوۆكين ناۋرىز ايىندا دەنني دجەيكوبسپەن، قىركۇيەكتە كانەلومەن ايقاسقا شىعاتىندىقتان، دايىندىق كەستەسى تىعىز بولدى. ونىڭ ۇستىنە ۋاقىت جەتىسپەگەن سوڭ، بۇل شارا ۇيىمداستىرىلماي قالدى. ول كەزدە دە بيللي دجو سوندەرسپەن كەزدەسۋدى جوسپارلادىق. ولار جەكپە- جەككە شىقسا كەرەمەت شايقاس بولاتىن ەدى» - دەيدى گولوۆكيننىڭ پروموۋتەرى توم لەففلەر.

سوڭعى ۋاقىتتا گولوۆكيننىڭ قارسىلاسى كانەلوعا بايلانىستى ءبىراز داۋلى ماسەلەلەر تۋىنداعان بولاتىن. الۆارەس سىناقتاردان وتسە، بۇكىل الەم تاعاتسىزدانا كۇتىپ وتىرعان ايقاس بولادى.

«سينكو دە مايودا بارلىعى جاقسى بولادى دەپ ۇمىتتەنەمىن. كانەلو بارلىق سىناقتاردان وتسە ارنايى تەكسەرۋ ءجۇرزىلىپ، ءبارىمىز كۇتكەن ايقاس بولادى. وسى كەزدەسۋدەن كەيىن بولاشاققا جوسپارلاساق بولادى. گەنناديدى جەكپە- جەك ءۇشىن قازاقستانعا اكەلسەك تاماشا بولار ەدى. كەزدەسۋدى 40 مىڭ ورىندىق فۋتبول الاڭىندا وتكىزۋگە بولادى. ولار بۇعان قاتتى قىزىعۋشىلىق تانىتىپ وتىر. ونىڭ ۇستىنە «StubHub Center»- گە قاراعاندا، بۇل ستاديوننىڭ شاتىرى بار» - دەپ كۇلدى لەففلەر.