قازاقستاندا گەنادان باسقا ەشكىم ءبىر ايقاستان 40 ميلليون دوللار تاۋىپ كورگەن جوق - ايدار ماحمەتوۆ

استانا. قازاقپارات - قازاقستاندا بىردە- ءبىر بوكسشى نەمەسە سپورتشى ءبىر ايقاستان نەمەسە ءبىر سايىستان گەننادي گولوۆكيندەي اقشا تاۋىپ كورگەن جوق.

بۇل تۋرالى ق ر  م م ا مەن پانكراتيوننان ۇلتتىق قۇرامانىڭ قۇرمەتتى پرەزيدەنتى ايدار ماحمەتوۆ وسىلاي دەدى، دەپ حابارلايدى «قازاقپارات» ح ا ا ءتىلشىسى.

«بۇل ايقاس وزىنەن جاس الۆارەستەن گورى گەناعا اسا ماڭىزدى ەدى. ويتكەنى، جەڭىلگەن جاعدايدا شەشىم گەنانى كەرى ىسىرىپ، وسى ۋاقىتقا دەيىن جەتكەن جەتىستىكتەرىن جوققا شىعارار ەدى. ءوزىمنىڭ جەكە بولجامىم ورىندالعان جوق. كوپشىلىك اراسىندا گەنانىڭ توپەلەگەن سوققىسىنا مەكسيكالىق شىداي الماي قالادى دەگەندەر دە بولدى. ءبىراق، «كانەلو» شىداس بەرۋمەن بىرگە ناعىز بوكسشىعا ءتان ايقاس كورسەتە ءبىلدى. ال گەنانىڭ ايقاستىڭ باسىنان اياعىنا دەيىن جوعارى قارقىنمەن ۇرىس سالعانى ۇنادى. ونىڭ ەكپىنى تۇراقتى بولدى. قىسىمدى ازايتقان جوق»، - دەيدى ول.

 ايدار ماحمەتوۆتىڭ ايتۋىنشا، گولوۆكين بۇيىرگە از سوققى جاساعان. «ادەتتە، ءبىز ونىڭ وسى باعىتتا جۇمىس ىستەيتىنىن، قارسىلاستارى وسى شابۋىلعا توتەپ بەرە الماي قالاتىنىن كورەتىنبىز. دەسە دە، گەناعا 7:5 ەسەبىمەن جەڭىستى بەرۋگە بولادى. ونىڭ جەڭىسى مەنىڭشە ەشقانداي كۇمان تۋعىزبايدى. ونىڭ ومىرىندەگى ەڭ باستى كەزدەسۋى دە وسى ايقاس. ناتيجە گەناعا كەرى اسەرىن بەرگەن جوق. ول انىق. نە دەسەك تە، ول ەلىنىڭ ماقتانىشى بولىپ قالدى. ساراپشىلاردىڭ باسىم بولىگى دە جەڭىس گەناعا تيەسىلى دەپ وتىر. سوندىقتان، ريەۆانشتى اسىعا كۇتەمىز. ءبارى جىلدام بولمايدى. حالىقتىڭ قىزىعۋشىلىعى ارتپاسا تومەندەمەيدى. بالكىم، وعان دەيىن گەنا تاعى ءبىر كەزدەسۋ وتكىزەر. ءبارى دە مەنەدجمەنتكە بايلانىستى»، - دەيدى ول.

 م م ا مەن پانكراتيون ۇلتتىق قۇراماسى پرەزيدەنتىنىڭ سوزىنە سۇيەنسەك، گەنانىڭ جەڭىسكە جەتۋىنە الۆارەستىڭ جوعارى شەبەرلىگى كەدەرگى كەلتىرگەن.

«كانەلونىڭ» قورعانىستاعى قابىلەتى جوعارى. گەنانىڭ بۇيىردەن سوققى جاساماعانىن ايتىپ جاتقانىمىزبەن، الۆارەستىڭ وڭ شىنتاعى ءبۇيىرىن جاۋىپ تۇرعانىن ۇمىتپاۋىمىز كەرەك. كاسىبي سپورت - ول سپورتتىق ەلەمەنتتەرى بار شوۋ. كاسىبي بوكستا قىرۋار اقشا تابۋ كوبىندە العا شىعىپ كەتەدى. كەز كەلگەن كاسىبي بوكسشى شارشى الاڭعا باسىن بايگەگە تىگىپ شىعادى. سوندىقتان، پروموۋتەردەن باستاپ تەلەارنالارعا دەيىن ءبارى دە كوپتەپ اقشا تابۋدىڭ امالىن قاراستىرادى. تەڭ ناتيجە بۇل ايقاسقا دەگەن قىزىعۋشىلىقتى ارتتىرا ءتۇستى، سەبەبى حالىق كىمنىڭ جەڭگەنىن تۇسىنبەي دال. مەنىڭشە، ەلىمىزدە بىردە- ءبىر سپورتشى گەناداي ءبىر ايقاستان 40 ميلليون ا ق ش دوللارىن تاۋىپ كورگەن جوق»، - دەپ ءتۇيدى ول.

 اۆتور: ايان بەكەن ۇلى