جىل سايىن «نۇرلى جەر» اياسىندا 40 مىڭ ادام جەكە ءۇيىن سالا الادى

استانا. قازاقپارات - وسىلايشا، 15 جىلدىڭ ىشىندە «نۇرلى جەر» باعدارلاماسى اياسىندا 600 مىڭنان استام ادام جەر تەلىمىن الىپ، جەكە ءۇيدى تۇرعىزا الادى، دەپ حابارلايدى قازاقپارات ءتىلشىسى.

 «وسىنداي جوسپار بار. بۇرىن جەر نەگە بەرىلمەدى؟ ينفراقۇرىلىم جەلىلەرى، ياعني سۋ مەن جارىق تارتىلماعاننان كەيىن جەر بەرىلمەدى. بيىلدان باستاپ «نۇرلى جەر» باعدارلاماسى اياسىندا جىل سايىن 80 ميلليارد تەڭگە قارجى بولىنەدى. سونىڭ 30-40 ميلليارد تەڭگەسى ينفراقۇرىلىم جەلىلەرىن تارتۋعا جۇمسالاتىن بولادى. جىل سايىن 40 مىڭ ادامعا جەر ۋچاسكەلەرى بەرىلەدى دەگەن جوسپارىمىز بار»، - دەدى ق ر ينۆەستيتسيالار جانە دامۋ مينيسترىلىگى قۇرىلىس جانە تۇرعىن ءۇي - كوممۋنالدىق شارۋاشىلىق ىستەرى كوميتەتىنىڭ ءتوراعاسى مارحابات جايىمبەتوۆ بۇگىن استانادا وتكەن باسپا ءسوز ءماسليحاتىندا.

 ونىڭ ايتۋىنشا، بۇگىندە رەسپۋبليكا بويىنشا جەر كەزەگىندە تۇرعانداردىڭ سانى 1 ميلليون 300 مىڭ ادامعا جەتكەن. ايتا كەتەيىك، اعىمداعى جىلدا نەسيەگە اقشاسى جوق ازاماتتارعا ارەندالىق پاتەرلەر سالىنادى. بۇدان بولەك، كوميتەت مەملەكەتتىك مەكەمەلەرگە باسپاناعا مۇقتاج قىزمەتكەرلەر ءۇشىن پاتەردىڭ العاشقى جارناسىن سالۋعا رۇقسات بەرۋ تەتىگىن ەنگىزۋدى كوزدەيدى.

 اۆتور: ارمان اسقاروۆ