امانگەلدى ايتالى: مەكتەپتەگى مۇعالىمدەردىڭ 40 پايىزى كۇيەۋىمەن اجىراسقان

استانا. قازاقپارات - اقتوبەدە زيالى قاۋىم وكىلدەرىنىڭ الدىندا ءسوز سويلەگەن تانىمال ساياساتكەر قوعامنىڭ باستى وتكىر پروبلەماسىن كوتەردى.

ول مەكتەپتەگى مۇعالىمدەردىڭ 45 پايىزى كۇيەۋىمەن اجىراسقانىن تىلگە تيەك ەتتى دەپ حابارلايدى NUR. KZ ءتىلشىسى.

قوعام قايراتكەرى اكەسىز ءوسىپ كەلە جاتقان بالالاردى كۇيەۋىمەن سىيىسپاعان مۇعالىمدەردىڭ تاربيەلەپ جاتقانىنا الاڭدادى.

«ماعان ءبىر مەكتەپتىڭ ديرەكتورى: «مەنىڭ وقۋشىلارىمنىڭ 45 پايىزىنىڭ اكەسى جوق، اجىراسقان وتباسىنان. ول بالانىڭ پسيحولوگياسى اكە-شەشەسى بار بالانىڭ وتباسىنداي تۇراقتى ەمەس. مەنىڭ مۇعالىمدەرىمنىڭ دەنى - ايەلدەر. ونىڭ 40 پايىزى بايىنان ايىرىلعان. اناۋ دا جىندى اكەسى جوق، مىناۋ دا جىندى بايى جوق. سىنىپتا شارت-شۇرت تالاس» دەپ ايتتى. بۇل - شىندىق»، - دەدى قوعام قايراتكەرى امانگەلدى ايتالى.

جاستار تاربيەسىنە زيالى قاۋىمنىڭ كوڭىل اۋدارۋىنا قاتىستى وتكەن كەزدەسۋدە بارىن باعالاي بىلمەيتىن جاستار لەگىنە قاتىستى دا ايتالىنىڭ ايتارى بولدى.

«ءبىز تۇتىنۋشى قوعام قۇردىق. دۇنيەقور، اقشا الدىنا شىققان، رۋحاني قۇندىلىقتاردان كەيىن قالعان قوعام. سوتسيوليستىك قوعامدا نە نارسەگە دە ءزارۋ بولدىق. ءبىزدىڭ اناعان، مىناعان قولىمىز جەتپەدى. مىنا زامان كەلدى. بارىنە قولىمىز جەتتى. تاربيە مەن رۋحاني قۇندىلىق كەيىنگە قالدى»، - دەدى امانگەلدى ايتالى.

ساياساتكەر دۇنيەقور زاماندا ادام كاپيتالىنىڭ ۇمىت قالعانىن ايتتى.

«بۇگىن وتە قيىن زامان. ۇرپاق الماسادى. ءبىز 40 جاسقا دەيىنگى جاستاردىڭ پىكىرىن كوپ بىلمەيمىز. تاۋەلسىزدىك العان كەزدە 13-14 جاستا بولعان جاستار بولەكتەۋ. ولارمەن جۇمىس جاساۋ كۇردەلى. باياعى ستاندارت كەلمەيدى»، - دەدى ول.