قانات پەن ايتكۇل قۇدايبەرگەنوۆتەردىڭ ساحنا تورىندە جۇرگەنىنە 40 جىل
كيەلى دومبىرانى قولعا الىپ، العاشقىلاردىڭ ءبىرى بولىپ دۋەت قۇرعان جۇپ جەتىسۋدىڭ ءتورى تالدىقورعاندا ارنايى كونسەرت بەردى. مەرەيتويلىق كەشكە حالىق كوپ جينالدى. كونسەرتتە «اگۋگاي، دومبىرا»، «سىرعالىم»، «كوزىڭنەن اينالايىن»، «جەلبىر جەكەن»، «جاناي سىلقىم» سىندى حالىقتىڭ ءسۇيىپ تىڭدايتىن اندەرى ورىندالدى.
ونەردە دە، ومىردە دە جۇپتارى جازىلماعان ونەرپازدار اۋلەتى 1988 - جىلدان باستاپ ءسۇيىنباي اتىنداعى الماتى وبلىستىق فيلارمونياسىندا ەڭبەك ەتىپ كەلەدى. ءداستۇرلى ونەردى كەڭىنەن ناسيحاتتاپ جۇرگەن وتباسى تالدىقورعان قالاسىندا تۇرادى. ءتورت بالاسى دا اتا- اناسىنىڭ ءىزىن باسىپ كەلەدى. ماسەلەن، ايبول كۇيشى، ءانشى، ءارى سازگەر. ال ەربول شەرتەر اسپابىندا وينايدى. ەربولات حالىققا تانىمال ەسترادا جۇلدىزى. سالتانات قىزدارى ءان ايتۋمەن قاتار، اكتريسالىق ونەرىن دە قاتار الىپ ءجۇر.
ايتا كەتۋ كەرەك، قانات قۇدايبەرگەنوۆ الماتى وبلىسى رايىمبەك اۋدانى نارىنقول اۋىلىنان. ال جارى ايتكۇل شىعىس قازاقستان وبلىسىندا دۇنيەگە كەلگەن. ەرلى- زايىپتىلار ونەر ناعاشىلارىنان دارىدى دەيدى.
اۆتور: سامال قابىشيەۆا
