ب ا ق: 40-قا جۋىق مەملەكەت پەن ۇكىمەت باسشىلارى وليمپيادانىڭ اشىلۋ سالتاناتىنا قاتىسادى
دەپ حابارلايدى ت ا س س اگەنتتىگى.
ءوز كەزەگىندە برازيليا سىرتقى ىستەر مينيسترلىگىنىڭ باسپا ءسوز قىزمەتى «قاۋىپسىزدىكتى ساقتاۋ ماقساتىندا وليمپيادا اشىلۋىنا كەلەتىن الەمدىك كوشباسشىلاردىڭ ناقتى سانى مەن اتى- جوندەرى اشىق ايتىلمايدى»، - دەگەن بولاتىن.
شىلدە ايىنىڭ سوڭىندا برازيليا سىرتقى ىستەر ءمينيسترى جوزە سەررا جۋرناليستەرگە 45 مەملەكەت جانە ۇكىمەت باسشىسى وليمپيادا اشىلۋىنا كەلەتىندەرىن راستادى دەپ حابارلاعان ەدى. ولاردىڭ اراسىندا فرانسيا مەن ارگەنتينا پرەزيدەنتتەرى، يتاليا پرەمەر- ءمينيسترى بار. ا ق ش اتىنان مەملەكەتتىك حاتشى كەلەدى دەپ كۇتىلۋدە، ول بۇگىن برازيليا س ءى م باسشىسىمەن كەزدەسۋ وتكىزەدى.
سەررانىڭ ايتۋىنشا، برازيليا پرەزيدەنتى لاۋازىمىنان ۋاقىتشا الاستاتىلعان ديلما رۋسسەففتىڭ يمپيچمەنت پروتسەسى الەمدىك كوشباسشىلاردىڭ اشىلۋ سالتاناتىنا قاتىسۋ شەشىمىنە ەش اسەر ەتكەن جوق. «يمپيچمەنتتىڭ كەسىرىنەن قانداي دا ءبىر باسشىنىڭ كەلمەۋى، كەلۋدەن باس تارتۋ وقيعاسى بولعان جوق. ءتىپتى وسى جايلى الىپ- قاشپا سوزدەردى دە ەستىگەن جوقپىن»، - دەدى مەكەمە باسشىسى. بۇعان دەيىن برازيليا اقپارات قۇرالدارى ەلدەگى ساياسي تۇراقسىزدىقتان كوپتەگەن الەمدىك كوشباسشىلار اشىلۋ سالتاناتىنا قاتىسۋدى سوڭىنا دەيىن راستاماي وتىرعانىن جازعان ەدى. ولارعا د. رۋسسەفف اتىنان شاقىرتۋلار جىبەرىلدى، ءبىراق رەسمي تۇردە برازيليانى پرەزيدەنت مىندەتىن ۋاقىتشا اتقارۋشى ميشەل تەمەر تانىستىراتىن بولادى.
لوندونداعى جازعى وليمپيادا ويىندارىنىڭ اشىلۋىنا 69 الەمدىك كوشباسشىلار قاتىسقان. سوچيدە وتكەن قىسقى ويىندارعا كەلگەن پرەزيدەنتتەر سانى ەلۋدەن كەم ەمەس.
2016 -جىلعى XXXI جازعى وليمپيادا ويىندارى 5-21 - تامىز كۇندەرى ريو- دە- جانەيرودا وتەدى. بۇل وڭتۇستىك امەريكادا وتەتىن العاشقى وليمپيادا. پاراليمپيادا بىرنەشە اپتادان كەيىن، 7-18 - قىركۇيەكتە وتەدى دەپ جوسپارلانعان.
اۆتور: قانات مامەتقازى ۇلى
