تانىمال اكتەر ايەلىن ولتىرگەنى ءۇشىن 40 جىلعا سوتتالۋى مۇمكىن

استانا. قازاقپارات - امەريكالىق اكتەر مايكل دجەيس كوپشىلىككە تانىمال «شيت» تەلەحيكاياسى مەن «فوررەست گامپ»، «پلانەتا وبەزيان» فيلمدەرى ارقىلى تانىس.

لوس-اندجەلەس سوتى اكتەر مايكلدى ايەلىنىڭ ولىمىنە كىنالى دەپ تاپتى.

بۇل تۋرالى BBC سايتى جازدى.

سوتتان مەملەكەتتىك ايىپتاۋشى اكتەردى 40 جىلعا باس بوستاندىعىنان ايىرۋدى سۇرادى.

مايكلدىڭ ايەلى 2014-جىلدىڭ مامىرىندا قايتىس بولعان ەدى. بولعان جايتتى پوليتسياعا اكتەردىڭ ءوزى حابارلاپ ايتقان ەدى. ول 911 تەلەفونىنا قوڭىراۋ شالىپ، وپەراتورعا ايەلىن ءوزى اتىپ العانىن ايتقان.

وقيعا ورنىنا كەلگەن پوليتسيا اكتەردىڭ ۇيىندەگى دالىزدەن 40 جاستاعى ەيپريل دجەيستى ءولى كۇيىندە تاپقان. سول ماڭدا ايەل اتىلعان قارۋ دا جاتقان.

مايكل دجەيس ايەلىنىڭ اكەسىنە تيەسىلى قارۋمەن ەيپريلدى ءبىرىنشى ارقا تۇسىنان، سوسىن اياعىنان اتقان. وقيعانى اكتەردىڭ ەكى بالاسى ءوز كوزدەرىمەن كورگەن.

اكتەردىڭ قازىر 10 جاسقا تولعان بالاسىنىڭ ايتۋى بويىنشا دجەيس ايەلىن اتباس بۇرىن «سەن قاشقاندى جاقسى كورەسىڭ عوي، وندا بۇلتتاردىڭ اراسىنا قاراي قاش» دەگەن.

53 جاستاعى مايكل دجەيس ءوزىن قورعاپ ءسوز سويلەۋدەن مۇلدە باس تارتقان. بۇعان دەيىن اكتەر پوليتسياعا بولعان وقيعادان كەيىن ءوزىن اتىپ تاستاماقشى بولعانىن، ءبىراق ول قولىنان كەلمەگەنىن ايتقان.

اكتەردىڭ قورعاۋشىلارى سوتتا ول ايەلىن ادەيى جوسپارمەن ەمەس اشۋ ۇستىندە اتىپ العانىن تۇسىندىرمەك بولعان. سوت ۇكىمى 10- ماۋسىمدا وقىلادى.