قازاقستاندا يسلامدىق قارجىلاندىرۋدىڭ كولەمى 40 ميلليارد دوللارعا جەتۋى مۇمكىن - ق. لاما- شاريف
بۇگىن سىرتقى ىستەر مينيسترلىگىندە جۋرناليستەرگە بريفينگ وتكىزگەن قازاقستاننىڭ بىرىككەن اراب امىرلىكتەرىندەگى توتەنشە جانە وكىلەتتى ەلشىسى قايرات لاما- شاريف وسىلاي ءمالىم ەتتى.
« وزدەرىڭىز بىلەتىندەي، بۇگىنگى تاڭدا امىرلىكتەر ايماقتا جالپىعا تانىلعان قارجى ورتالىعىنا اينالعان. سونىمەن قاتار، وسى اراب ەلىندە اسا ۇلكەن ەكونوميكالىق جانە ينۆەستيتسيالىق الەۋەت شوعىرلانعان. ياعني، امىرلىكتەردە جيىنتىق كولەمى 1 تريلليون ا ق ش دوللارىنان اساتىن الەمدىك ءىرى ينۆەستيتسيالىق قور بار»، - دەدى ەلشى.
ق. لاما- شاريف اتاپ وتكەندەي، قازاقستاننىڭ ينۆەستيتسيالىق ساياساتىنىڭ ءبىر باسىم بولىگى - استانا حالىقارالىق قارجى ورتالىعىن قۇرۋ. امىرلىكتەر ءوز تاراپىنان دۋباي حالىقارالىق قارجى ورتالىعىنىڭ تاجىريبەسىن بولىسۋگە ۇلكەن ىقىلاس تانىتىپ وتىرعانىن دا ايتتى ەلشى.
« امىرلىكتەر تاراپى ءوزىنىڭ تاجىريبەسى مەن ءبىلىمىن ۇلكەن قۇلشىنىسپەن بولىسۋگە دايىن ەكەنىن ايتتى. كەشە عانا وتكەن استانا ەكونوميكالىق فورۋمىندا دۋباي حالىقارالىق قارجى ورتالىعىنىڭ ۆيتسە- پرەزيدەنتى وسىنى راستادى. دۋباي حالىقارالىق قارجى ورتالىعىنىڭ تاجىريبەسى استانا حالىقارالىق قارجى ورتالىعىن دامىتۋعا قۋاتتى سەرپىن بەرەدى دەپ كۇتىلۋدە. جانە قازاقستاننىڭ ەكونوميكاسىنا 350 ميلليارد دوللار ينۆەستيتسيا تارتۋعا مۇمكىندىك بەرەدى. وزدەرىڭىز بىلەسىزدەر، استانا حالىقارالىق قارجى ورتالىعىنىڭ جاڭا باعىتى - ەكونوميكامىزداعى كوپتەگەن جوبالارعا يسلام قارجىلاندىرۋىن تارتۋ. وسى رەتتە، يسلام قارجىلاندىرۋ كولەمى 40 ميلليارد دوللارعا جەتۋى مۇمكىن»، - دەدى ق. لاما- شاريف.
«قازاقستان رەسپۋبليكاسى ۇلتتىق بانكىنىڭ مالىمەتىنە سۇيەنسەك، 2005 -جىلدان باستاپ 2016 -جىلدىڭ ءبىرىنشى توقسانىنا دەيىن امىرلىكتەردەن ەلىمىزدىڭ ەكونوميكاسىنا تارتىلعان تىكەلەي شەتەلدىك ينۆەستيتسيانىڭ جالپى كولەمى 2 ميلليارد دوللاردى قۇرايدى»، - دەپ ءمالىم ەتتى ەلشى.
استانا ەكونوميكالىق فورۋمىنىڭ پلەنارلىق وتىرىسىندا ەلباسى ن. نازاربايەۆ تاۋەلسىزدىك جىلدارىندا قازاقستاننىڭ ەكونوميكاسىنا 255 ميلليارد دوللار تىكەلەي شەتەلدىك ينۆەستيتسيا تارتىلعانىن ايتقان ەدى. ق. لاما- شاريف تە بۇل ءسوزدى ەسكە سالا وتىرىپ، وسى ينۆەستيتسيانىڭ 2 ميلليارد دوللارى - بىرىككەن اراب امىرلىكتەرىنە تيەسىلى ەكەنىن اتاپ ءوتتى.
«سونداي- اق، ءبىزدىڭ ەكونوميكامىزعا 2013 -جىلى - 532 ميلليون دوللار، 2014 -جىلى - 198 ميلليون دوللار، 2015 -جىلدىڭ التى ايىندا - 50 ميلليون دوللار تارتىلعان»، - دەپ حابارلادى ق. لاما- شاريف.
«ەكىجاقتى ساۋدا قاتىناستار جالپى ىلگەرى دامۋدا جانە بولاشاقتا دامي تۇسپەك. بىرىككەن اراب امىرلىكتەرى قازاقستاننىڭ تاۋار اينالىمىندا الەمدەگى 205 مەملەكەت ىشىندە 52- ورىنعا يە. سونىڭ ىشىندە، ازياداعى 42 مەملەكەت ىشىنەن 16- ورىندا تۇر. 2015 -جىلى ەكى ەل اراسىنداعى تاۋار اينالىمى 109,5 ميلليون ا ق ش دوللارىن قۇراعان»، - دەدى ەلشى.
ق. لاما- شاريف ءمالىم ەتكەندەي، بىلتىر امىرلىكتەرگە شىعارعان ەكسپورتىمىز 45,5 ميلليون دوللاردى، يمپورتىمىز 67 ميلليون دوللاردى قۇراعان.
اۆتور: كەنجەكەي توقتامۇرات قىزى
