16:10, 26 - مامىر 2016 | GMT +5
ن. نازاربايەۆ الەم بويىنشا وففشورلاردا جاسىرىلعان 40 تريلليون دوللار جاتقانىن ايتتى
استانا. قازاقپارات - الەمدىك ساراپشىلاردىڭ باعالاۋىنشا، وففشورلىق (جاسىرىلعان، كولەڭكەدەگى، قارجىلىق قيتۇرقىلىقتى پايدالانعان اقشالار - رەد.) شوتتاردا 30-40 تريلليون دوللار جاتىر.
بۇگىن استانا ەكونوميكالىق فورۋمىنىڭ جالپى وتىرىسىندا ق ر پرەزيدەنتى نۇرسۇلتان نازاربايەۆ وسىلاي ءمالىم ەتتى.
«بۇگىندە الەمدىك ساراپشىلاردىڭ باعالاۋىنشا، وففشورلىق شوتتاردا 30-40 تريلليون دوللار جاتىر ەكەن. وسى اكتيۆتەردىڭ تىم بولماعاندا ءبىر پايىزىن جۇمساعاندا، دامۋشى ەلدەردەگى ءبىلىم بەرۋ مەن دەنساۋلىق ساقتاۋ سالالارى جاڭا جاقسى دەڭگەيگە كوتەرىلەر ەدى»، - دەدى ەلباسى ن. نازاربايەۆ.
قازاقستان پرەزيدەنتى حالىقارالىق ۆاليۋتا قورى مەن دۇنيەجۇزىلىك بانك جاھاندىق ەكونوميكانى وففشوردان ارىلتۋ جونىندە ءتيىمدى وڭتايلاندىرۋ شارالارىن ۇسىنا الاتىنىنا سەنىم ءبىلدىردى.
اۆتور: كەنجەكەي توقتامۇرات قىزى
