ەلباسى: وتكەن جىلى استانا قازاقستان ەكونوميكاسى ءوسىمىنىڭ 40 پايىزىن قامتاماسىز ەتتى- فوتو
بۇل تۋرالى بۇگىن استانا قالاسىنىڭ الەۋمەتتىك-ەكونوميكالىق دامۋى مەن ەكسپو كورمەسى ماسەلەلەرىنە ارنالعان كەڭەستە ق ر پرەزيدەنتى نۇرسۇلتان نازاربايەۆ ءمالىم ەتتى.
«مەن قازىر عانا سالىنىپ جاتقان نىسانداردى كوردىم، قارقىنى قىزۋ. بەلگىلەنگەن كەستە ورىندالىپ جاتىر. كۇن سايىن قۇرىلىس نىساندارىندا ون مىڭ ادام جۇمىس ىستەۋدە»، - دەدى ەلباسى.
وسى رەتتە مەملەكەت باسشىسى كورمەنى ۇيىمداستىرۋ جانە وتكىزۋ تاۋەلسىز قازاقستاننىڭ بارلىق جەتىستىكتەرى مەن ەلوردامىزدىڭ كەلبەتىن پاش ەتۋى تيىستىگىن باسا ايتتى.
«ال ءبىزدىڭ جەتىستىكتەرىمىز بار. وتكەن جىلدىڭ قورىتىندىسىندا عانا استانا ەل وڭىرلەرى اراسىندا ىشكى ءونىم ءوسىمىنىڭ ەڭ جوعارى قارقىنىنا، بەس پايىزدىق دەڭگەيىنە قول جەتكىزىپ، 2015-جىلى بۇكىل قازاقستان ەكونوميكاسى ءوسىمىنىڭ 40 پايىزىن قامتاماسىز ەتتى. استانالىقتاردى بۇل جەتىستىكتەرىمەن قۇتتىقتاۋعا دا بولادى»، - دەدى ن. نازاربايەۆ.
ق ر پرەزيدەنتىنىڭ اتاپ وتۋىنشە، ەلوردادا ينۆەستيتسيا تارتۋ باعىتىندا دا ايتارلىقتاي جۇمىستار جۇرگىزىلدى. جالپى، ەلوردا قۇرىلعان كۇننەن بەرى تارتىلعان ينۆەستيتسيا كولەمى 6 تريلليون تەڭگەدەن اسىپ جىعىلدى. ونىڭ 2 تريلليون تەڭگەسى مەملەكەت بيۋدجەتىنەن بولىنگەن بولاتىن. الايدا بۇگىنگى كۇننىڭ وزىندە ەل قازىناسىنا سالىق تۇرىندە 4 تريلليون تەڭگە اۋدارىلعان.
«ياعني، بۇل مەملەكەت جۇزەگە اسىرعان وتە ءتيىمدى جوبا بولىپ وتىر. وزدەرىڭىز كورىپ وتىرعانداي، مەملەكەت شىعىنداعان قارجى ءبىر دەمدە قايتارىلدى. بۇعان قوسا، وتكەن جىلى استانا العاش رەت ءبىزدىڭ بيۋدجەتىمىزدىڭ دونورى بولدى. 900 ميلليارد تەڭگە اۋدارىلدى. بارلىق تۇسىمدەردىڭ 75 پايىزى قالا حالقىنىڭ جارتىسىن جۇمىسپەن قامتىپ وتىرعان شاعىن جانە ورتا بيزنەس ۇلەسىندە. بۇل بارشا قازاقستان ۇمتىلاتىن دەڭگەي»، - دەدى ەلباسى.
اۆتور: مارلان جيەمباي
