قوستانايدان ەكى رەسەيلىك 40 كەلى كۇمىسپەن ۇستالدى
«قوستاناي شەكارا جاساعىنىڭ «قايراق اۆتو» باقىلاۋ بولىمشەسىندە 1 -قاڭتاردا 38 جانە 45 جاستاعى اعايىندى ەكى رەسەي ازاماتى ۇستالدى. ولار «لادا پريورا» اۆتوكولىگىمەن رەسەيگە قاراي بەت العان. كولىكتى تەكسەرۋ كەزىندە ونىڭ بەنزين باگىندا بوتەن زات تابىلدى. اعايىندىلاردىڭ ءبىرى بۇل 20 كيلوگرام وڭدەلمەگەن كۇمىس ەكەندىگىن مويىندادى»، - دەلىنگەن حابارلامادا.
ءارى قاراي تەكسەرۋ بارىسىندا اۆتوكولىكتىڭ ارتقى ورىندىقتارىنىڭ استىنان تاعى دا ءبىر وراما تابىلدى. وندا سالماعى 7 ك گ بولاتىن كۇمىستەن جاسالعان ءارتۇرلى زەرگەرلىك بۇيىمدار بولدى.
كەيىن پوليتسيا قىزمەتكەرلەرى شەكاراشىلارمەن جانار-جاعار ماي باگىن اشتى. ودان 20 كەلى كۇمىستىڭ ورنىنا 33 كەلى كۇمىس شىعارىلدى.
كولىكتەن جالپى العاندا 40 كەلى اق ءتۇستى مەتالل (كۇمىس) تابىلدى.
ۇستالعان ازاماتتاردا زەرگەرلىك زاتتاردىڭ 5 قۇجاتى بار. بۇل 64 اتاۋلى 4770 بۇيىمعا عانا تيەسىلى. قاعازدار مەن فيسكالدى چەكتەر ر ف داعىستان رەسپۋبليكاسىنىڭ ماحاچقالا قالاسىندا بەرىلگەن.
ۇستالعاندار قوستاناي وبلىسى قارابالىق اۋدانىنىڭ ءى ءى ب- ىنە تاپسىرىلدى.
اۆتور: قانات مامەتقازى ۇلى
