قازاقستان ارقىلى قىتايدان ەۋروپاعا جەتكىزىلەتىن جۇك تاسىمالى 40 مىڭ كونتەينەردەن اسادى - ن. نازاربايەۆ

بۇل تۋرالى اعىمداعى جىلدىڭ 31 -تامىزى مەن 3 -قىركۇيەگى ارالىعىندا بەيجىڭگە جوسپارلانىپ وتىرعان ساپارى اياسىندا قىتايدىڭ جەتەكشى «شينحۋا» اقپارات اگەنتتىگىنە ەكسكليۋزيۆتى سۇحبات بەرگەن ق ر پرەزيدەنتى نۇرسۇلتان نازاربايەۆ ايتتى.
«جاڭا جىبەك جولى» - بۇل جاھاندىق اۋقىمداعى جوبا. ول ءبىزدىڭ ەلدەرىمىزدىڭ ەكونوميكالىق سەرىكتەستىكتىڭ جاڭا كەزەڭگە كوشكەندىگىن بىلدىرەدى. بۇعان قوسا، ول بارشا ەۋرازيا قۇرلىعىنداعى كولىك- لوگيستيكالىق لاندشافتتى وزگەرتەدى. جوبانىڭ ءمانى باستى ەكونوميكالىق ورتالىقتار اراسىنداعى بارىنشا جەدەل ءارى سەنىمدى جۇك تاسىمالىن قامتاماسىز ەتۋدە بولىپ وتىر. بۇل بيزنەس ءۇشىن دە، حالىق ءۇشىن دە ءتيىمدى. جىبەك جولى - بۇل ءبىر عانا باعدار ەمەس، ول بىزدەردى اتالعان ماقساتتارعا جاقىنداتا تۇسەتىن كوممۋنيكاتسيا جۇيەسى. ءبىزدىڭ ەلدەرىمىز اتالعان جۇيەنى دامىتۋ ءۇشىن كوپتەگەن جۇمىستاردى اتقاردى»، - دەدى ەلباسى.
مەملەكەت باسشىسىنىڭ اتاپ وتۋىنشە، ءىس جۇزىندە قىتايدىڭ تىنىق مۇحيتى جاعالاۋىن كاسپيي تەڭىزىمەن جالعايتىن تەمىر جول ءدالىزى قۇرىلعان. مۇنان ارى «قازاقستان- تۇركىمەنستان- يران» دالىزىمەن ينتەگراتسيالانۋ ارقىلى كوپتەگەن ءىرى نارىقتارعا شىعۋ قامتاماسىز ەتىلەدى.
«قازىردىڭ وزىندە قىتايدان ەۋروپا باعىتىنا جانە كەرى كونتەينەرلىك پويىزدار قوزعالىسى كەڭەيىپ كەلەدى. ماسەلەن، اعىمداعى جىلدىڭ 7 ايى ىشىندە ءبىزدىڭ ەلىمىز ارقىلى 234 پويىز وتكىزىلدى. بۇل 2014 -جىلدىڭ سايكەس كەزەڭىندەگى كورسەتكىشتەن ءۇش ەسە ارتىق. جىل قورىتىندىسىنا بۇل باعىتتاعى جۇك اينالىمى 40 مىڭ كونتەينەردەن اسىپ تۇسەدى دەپ كۇتىلۋدە. باسىم بولىگى ءبىزدىڭ ەل ارقىلى وتەتىن «باتىس قىتاي - باتىس ەۋروپا» اۆتوجولىنىڭ قۇرىلىسى دا قارقىندى جۇرگىزىلۋدە. سونىمەن قاتار، ءىرى ينفراقۇرىلىمدىق جوبالار قاتارىندا قورعاس حالىقارالىق شەكارالىق ىنتىماقتاستىق ورتالىعى، «التىنكول- قورعاس» جاڭا تەمىر جول وتكەلى، «قورعاس- شىعىس قاقپاسى» ا ە ا كولىك- لوگيستيكالىق كەشەنىن اتاپ وتۋگە بولادى» ، - دەدى ق ر پرەزيدەنتى.
ەلباسى سۇحبات بارىسىندا قازاقستاندا كەشەندى ينفراقۇرىلىمداردى دامىتۋعا باعىتتالعان «نۇرلى جول» باعدارلاماسى جۇزەگە اسىرىلىپ جاتقانىن اتاپ وتكەن. بۇل باعدارلاما دا ەۋروپا مەن ازيانى جالعايتىن ناعىز كوپىر بولىپ سانالاتىن ءبىزدىڭ ەلىمىزدىڭ كەڭىستىگىن جاڭا جىبەك جولى جۇيەسىمەن ينتەگراتسيالاۋداعى تاعى ءبىر قادام بولماق.
«وسىلايشا، جاھاندىق باعداردىڭ نەگىزى قازىردىڭ وزىندە قالىپتاستى. ەندىگى ۋاقىتتا كولىك اعىندارىن رەتكە كەلتىرۋ جۇمىستارىمەن اينالىسۋ قاجەت. مۇنان بولەك، جاڭا جىبەك جولى كولىكتىك- لوگيستيكالىق جوبا اياسىنان شىعىپ كەتەدى - ول تولىقتاي العاندا ەكونوميكالىق دامۋ بەلدەۋى رەتىندە تانىلعان. بۇل باعىتتا دا بىزدەردىڭ ەلدەرىمىز قارقىندى جۇمىستار جۇرگىزۋدە.
اتاپ ايتقاندا، جالپى سوماسى 30 ميلليارد دوللاردان اسىپ جىعىلاتىن 48 ينۆەستيتسيالىق جوبا ىرىكتەپ الىنعان. ولار مىعىم ىسكەرلىك سەرىكتەستىڭ تىنىنە اينالادى»، - دەدى مەملەكەت باسشىسى.
اۆتور: مارلان جيەمباي