قىرعىزستاندا 40 مىڭ ءتولقۇجات زاڭسىز بەرىلگەن
«قىرعىز ازاماتتارىنا ءتولقۇجاتتاردى زاڭسىز بەرۋ بويىنشا ىستەردى تەرگەۋ بارىسىندا جەكە باستى كۋالاندىراتىن زاڭسىز قۇجاتتاردىڭ سانى بۇعان دەيىن حابارلانعانداي 30 مىڭعا ەمەس، 40 مىڭعا جەتكەنى انىقتالدى»، - دەپ مالىمدەدى ءمينيستردىڭ ورىنباسارى.
ونىڭ ايتۋىنشا، 2014-جىلدان باستاپ زاڭسىز بەرىلگەن ءتولقۇجاتتار فاكتىسى بويىنشا 21 قىلمىستىق ءىس قوزعالدى، 11 ادام جاۋاپكەرشىلىككە تارتىلدى، 2 ادام ءۇي قاماۋىندا وتىر. ۇستالعان ءبىر ازاماتقا قاتىستى ءىس سوتقا تاپسىرىلدى. ىستە كۋاگەر رەتىندە ق ر مەملەكەتتىك تىركەۋ قىزمەتىنىڭ باسشىسى ءالينا شايىقوۆا سۇرالدى.
قىرعىز ءتولقۇجاتتارىن زاڭسىز العانداردىڭ اراسىندا بۇرىن سوتتالعان 58 ازامات جانە ىزدەۋدە بولعان 8 ازامات بار. ق. ساتىۆالديەۆتىڭ حابارلاۋىنشا، قىرعىز ءتولقۇجاتىن زاڭسىز بەرگەنى ءۇشىن دەلدالدارعا 200 دوللاردان باستاپ 1,5 مىڭ دوللارعا دەيىن تولەگەن.
