يەمەندە 40 جىلعا جۋىق تۇرىپ كەلە جاتقان قازاق ازاماتشاسى ەلگە ورالدى

استانا. قازاقپارات - ازامات سوعىسى ورشىگەن يەمەندە قالىپ قويعان قازاقستان ازاماتشاسى گۇلميرا ساحانوۆا الماتىعا كەلدى.

وق پەن وتتىڭ اراسىنان جەتكەن قانداسىمىزدى بالاسى مەن ءسىڭلىسى جانە ءبىر توپ جۋرناليست كۇتىپ الدى.

اتاجۇرتقا تابانى تيە سالاسىمەن گۇلميرا ساحانوۆانىڭ كوڭىلى بوساپ، كوز جاسىنا ەرىك بەردى. قازىر يەمەندەگى جاعدايدىڭ ۋشىعىپ تۇرعانىن ايتقان جەرلەسىمىز ءوزىن قۇتقارۋعا اتسالىسقان قىزمەتتەردىڭ بارلىعىنا ريزاشىلىعىن ءبىلدىردى.

گۇلميرا ساحانوۆا جانە ت م د ەلدەرىنىڭ 100 دەن استام ازاماتى رەسەيدىڭ توتەنشە جاعدايلار مينيسترلىگىنىڭ ۇشاعىمەن يەمەننەن ماسكەۋگە جەتكىزىلگەن بولاتىن.

گۇلميرا ساحانوۆا كۇيەۋىمەن لەنينگرادتا وقىپ جۇرگەندە تانىسقانىن، تۇرمىسقا شىعىپ، 40  جىلعا جۋىق يەمەندە تۇرىپ كەلە جاتقانىن ايتتى. كۇيەۋى ازىرگە يەمەندە قالعان. ۇلكەن ۇلى جۇبايىمەن الماتىدا تۇرسا، كەنجەسى سانكت-پەتەربورداعى ۋنيۆەرسيتەتتەردىڭ بىرىندە وقيدى. گۇلميرا ساحانوۆا، يەمەننەن ورالعان ازاماتشا:

- بومبالاعاندا، جانىڭدى قويارعا جەر تاپپاي قالاسىڭ. سەكۋند سايىن كەلەسى سنارياد قايدا تۇسەر ەكەن دەپ ۋايىمدايسىڭ. جارىق جوق، سۋ جوق. يەمەننىڭ تەلەۆيدەنيەسى مۇلدەم ىستەمەيدى. ايتەۋىر 1-2 ساعاتقا قوسىلعاندا، ءبىر نارسە ەستىپ قالۋعا تىرىسامىز. اقپارات تۇسىنىكسىز. ازامات سوعىسى ءجۇرىپ جاتىر.

ميرا قۋاتبەكوۆا، گۇلميرا ساحانوۆانىڭ تۋىسى:

- بارىنە راحمەت. جەدەل تۇردە مەنىڭ اپكەمدى سوعىس بولىپ جاتقان جەردەن شىعاردى. ونىڭ قالاي كەلە جاتقانىن، بارلىعىن بىزگە ايتىپ وتىردى.

www.24.kz