بيىل 402 مىڭ ءسابي دۇنيەگە كەلگەن

بۇل تۋرالى ق ر دەنساۋلىق ساقتاۋ ۆيتسە-ءمينيسترى ۆياچەسلاۆ دۋدنيك ايتتى، دەپ حابارلايدى قازاقپارات ءتىلشىسى.

«مەملەكەت باسشىسى حالىققا جولداۋىندا باقىتتى بالالىق شاق پەن وسكەلەڭ ۇرپاقتىڭ بولاشاعىن قامتۋ جالپىۇلتتىق مىندەت ەكەنىن باسا ايتتى. بالا مەن انا ساۋلىعى ءبىزدىڭ ۆەدومستۆونىڭ باستى مىندەتتەرىنىڭ ءبىرى. وزدەرىڭىز بىلەتىندەي، بيىل ەلىمىزدە بالالار جىلى اتالىپ وتىلۋدە. قازىر قازاقستاندا 6,6 ميلليوننان استام بالا بار. ونىڭ ىشىندە 5 جاسقا دەيىنگى 2,5 ميلليون بالا بار جانە 3,4 ميلليون مەكتەپ جاسىنداعى بالا. ايتا كەتسەم، بالالارعا مەديتسينالىق كومەك مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا كورسەتىلەدى»، - دەدى ۆياچەسلاۆ دۋدنيك ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ۆيتسە-ءمينيستردىڭ مالىمدەۋىنشە، ەلىمىزدە 5690 مەديتسينالىق نىسان بالالارعا امبۋلاتوريالىق قىزمەت ۇسىنادى.

«بالالارعا ستاتسيونارلىق كومەك كورسەتۋ ماقساتىندا وبلىستاردا 13 بالالار اۋرۋحاناسى، اۋدانداردا 204 جانە 10 قالالىق اۋرۋحانا جۇمىس ىستەپ تۇر. بارلىعى 8 مىڭنان استام توسەك-ورىن قاراستىرىلعان. ودان بولەك، ەلوردادا انا مەن بالا ورتالىعى جانە الماتىدا پەدياتريا جانە بالالار حيرۋرگياسى عىلىمي ورتالىعى جۇمىس ىستەپ تۇر. اتالعان ورتالىقتار جوعارى تەحنولوگيالى جانە زامانۋي جابدىقپەن قامتىلعان»، - دەيدى ول.

سونداي-اق ۆ. دۋدنيك ەلىمىزدەگى تۋۋ كورسەتكىشىنە قاتىستى اقپاراتپەن ءبولىستى.

«ەل اۋماعىندا 249 بوسانۋعا ارنالعان ۇيىم بار. ونىڭ ىشىندە 39 پەريناتالدى ورتالىق جانە 49 بالالاردى وڭالتۋ ورتالىعى. بيىل بالالارعا امبۋلاتورلىق دەڭگەيدە 118 ميلليون كونسۋلتاتسيالىق-دياگنوستيكالىق قابىلداۋ جۇرگىزىلدى. سول سياقتى جىل باسىنان بەرى 402 مىڭ ءسابي دۇنيەگە كەلدى»، - دەدى مينيستر ورىنباسارى.