قازاقستاندا جىل سايىن 400 مىڭنان استام نارەستە دۇنيەگە كەلەدى

استانا. قازاقپارات - دەنساۋلىق ساقتاۋ مينيسترلىگى انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا ەمبەرگەنوۆا ەلدەگى تۋۋ كورسەتكىشتەرىن جاريالادى، دەپ حابارلايدى قازاقپارات ءتىلشىسى.

«بالالاردىڭ دەنساۋلىعىن ساقتاۋ جانە نىعايتۋ ماڭىزدى باعىتتاردىڭ ءبىرى سانالادى. بۇگىندە ەلىمىزدە 6,6 ميلليوننان استام بالا تۇرادى. سوڭعى 5 جىلدا بالالار سانى 800 مىڭعا كوبەيدى. جىل سايىن ەلدە 400 مىڭنان استام بالا دۇنيەگە كەلەدى. بۇل - وتە جاقسى دەموگرافيالىق كورسەتكىش»، - دەدى ماعريپا ەمبەرگەنوۆا ورتالىق كوممۋنيكاتسيالار قىزمەتىندە وتكەن بريفينگىدە.

ونىڭ ايتۋىنشا، ەلىمىزدە 5 مىڭنان استام دەنساۋلىق ساقتاۋ نىسانى بالالارعا امبۋلاتوريالىق كومەك كورسەتەدى.

«بۇدان بولەك، بالالارعا ستاتسيونارلىق كومەك كورسەتەتىن 14 مىڭنان استام توسەك- ورىن اشىلدى. بالالارعا مەديتسينالىق كومەك كورسەتۋ جۇكتىلىك كەزەڭنەن باستالادى. ماسەلەن، جىل سايىن ەلىمىزدە 500 مىڭ جۇكتى ايەل حالىقارالىق ستاندارتقا ساي بارلىق سكرينينگ پەن تەكسەرۋلەردەن وتەدى»، - دەپ باياندادى ماعريپا ەمبەرگەنوۆا.

قوسا كەتسەك، اتالعان بريفينگىگە قاتىسقان بىرىككەن ۇلتتار ۇيىمىنا قاراستى بالالار قورىنىڭ قازاقستانداعى وكىلى ارتۋر ۆان ديزەن ەل اۋماعىندا بالالار قۇقىعى جونىندەگى ءبىرىڭعاي ورتالىق ورگان قۇرۋدى ۇسىندى.