الىس شەتەلدەردەن 400 ميلليون دوللار قايتارىلدى - بەرىك اسىلوۆ

جينالىستى اشقان بەرىك اسىلوۆ اعىمداعى جىلدىڭ بەس ايىنداعى كوميسسيا جۇمىسىنىڭ ناتيجەلەرىنەن حاباردار ەتتى. اتاپ ايتقاندا، جالپى سوماسى 630 ميلليارد تەڭگەدەن استام مەملەكەتكە زالال وتەلدى جانە اكتيۆتەر قايتارىلدى. الىس شەت ەلدەردەن شامامەن 400 ميلليون دوللار ەلگە كىرگىزىلدى.

«قاداعالاۋ اكتىلەرى بويىنشا 5 ميلليارد تەڭگە سوماسىنا 140 مىڭ گەكتاردان استام زاڭسىز بەرىلگەن نەمەسە نىسانالى ماقساتى بويىنشا پايدالانىلماعان جەر ۋچاسكەلەرى قايتارىلدى.

كەدەن سالاسىندا پروكۋرورلىق تەكسەرۋ ناتيجەلەرى بويىنشا بيۋدجەتكە 57 ميلليارد تەڭگە ءتۇستى.

سوتتارعا قۇنى 13,5 ميلليارد تەڭگە بولاتىن مۇلىكتى مەملەكەتكە قايتارۋ تۋرالى 13 تالاپ قويۋ ەنگىزىلدى»، - دەدى باس پروكۋرور.

جوعارعى سوتقا وليگوپوليالار پايداسىنا شىعارىلعان سوت اكتىلەرىن قايتا قاراۋ جونىندە 23 نارازىلىق ەنگىزىلدى. بۇگىندە ولاردىڭ ىشىندە 16 نارازىلىق قاناعاتتاندىرىلدى، ناتيجەلەرى بويىنشا بيۋدجەتكە 23 ميلليارد تەڭگە ءتۇسۋى كۇتىلۋدە. تاعى 7 نارازىلىق قارالىپ جاتىر.

قاداعالاۋ ورگانىنىڭ باسشىسى مەملەكەت باسشىسىنىڭ وسى سالاداعى تاپسىرماسىن ىسكە اسىرۋعا تارتىلعان ءاربىر ۋاكىلەتتى ورگاننىڭ ءرولىن ەرەكشە اتاپ ءوتتى.

ول سونداي- اق اكتيۆتەردى قايتارۋ جونىندەگى كوميسسيانىڭ ءاربىر شەشىمى ادال بيزنەسكە ارالاسۋ جانە قىسىم جاساۋ فاكتىلەرىنە جول بەرمەي، بايىپتى جانە زاڭ تالاپتارى شەڭبەرىندە عانا قابىلدانۋى ءتيىس ەكەنىن ەسكە سالدى.

وتىرىس قورىتىندىسى بويىنشا كوميسسيا جۇمىسىنىڭ تيىمدىلىگىن ودان ءارى ارتتىرۋ جونىندە شەشىمدەر قابىلداندى.