ەلىمىزدە 400 دەن استام بالا كوروناۆيرۋسپەن اۋىرىپ جاتىر
ق ر دەنساۋلىق ساقتاۋ ءمينيسترى اجار عينيات ورتالىق كوممۋنيكاتسيالار قىزمەتىندە وتكەن بريفينگىدە وسىنداي دەرەك كەلتىردى، دەپ حابارلايدى قازاقپارات ءتىلشىسى.
«جىل باسىنان بەرى كوروناۆيرۋسپەن 6 مىڭنان استام بالا اۋىردى. قازىرگى تاڭدا اۋرۋحانالاردا 423 بالا ەمدەلىپ جاتىر. ءاربىر بالانىڭ دەنساۋلىعىن مينيسترلىكتىڭ دەڭگەيىندە قاراپ وتىرامىز. جەدەل شتابىمىز بار ەكەنىن، بالالاردىڭ دەنساۋلىعى ۇنەمى قارالىپ وتىراتىنىن ايتقان بولاتىنمىن»، - دەدى ۆەدومستۆو باسشىسى.
سونداي-اق، ول اتالعان بالالاردىڭ سىرقاتتى قالاي وتكەرىپ جاتقانىنا توقتالدى.
«قازىر اۋىرىپ جاتقان بالالاردىڭ 21 پايىزى جەڭىل، 77 پايىزى ورتاشا، 0,7 پايىزى اۋىر وتكەرىپ جاتىر. ياعني، قازىر 3 بالا رەانيماتسيادا جاتىر. ول بالالاردىڭ دەنساۋلىعىن دارىگەرلەر، سونىڭ ىشىندە رەسپۋبليكالىق دەڭگەيدەگى ماماندار ەمدەۋگە ارالاسىپ وتىر»، دەدى مينيستر.
مينيسترلىك مالىمەتىنە سۇيەنسەك، كەيىنگى ەكى جىلدا قازاقستاندا زاڭسىز ءدارى اينالىمىنىڭ 700 دەرەگى تىركەلگەن.
«دەنساۋلىق ساقتاۋ مينيسترلىگى دارىلىك زاتتاردىڭ زاڭسىز اينالىمىن باقىلاۋ اياسىندا ۇدايى مونيتورينگ جۇرگىزىپ وتىرادى. كەيىنگى ەكى جىلدا ونداي زاڭ بۇزۋدىڭ 700 دەي جاعدايى تىركەلدى. دارىلىك زاتتاردى زاڭسىز ساتقانى ءۇشىن 80 ميلليون تەڭگەدەن استام ايىپپۇل سالىندى. بيىل 2 جاعداي تىركەلىپ، 2 قىلمىستىق ءىس قوزعالدى»، - دەدى اجار عينيات.
