ءبىر ءوزى 400 جاۋ اسكەرىن ولتىرگەن شىعىس قازاقستاندىق مەرگەنگە ەسكەرتكىش ورناتىلادى
تولەۋعالي ابدىبەكوۆ 1916 -جىلى جارما اۋدانىندا دۇنيەگە كەلگەن. جاستايىنان اڭشىلىعىمەن اتى شىققان ول 1942 -جىلى مايدانعا ارالاسادى. سول جىلدىڭ وزىندە-اق ونىڭ 219 جاۋ اسكەرىن وققا بايلاعانى تۋرالى تاريحي دەرەك 8- گۆارديالىق اتقىشتار ديۆيزياسىنىڭ اسكەري ەسەبىندە ساقتالعان.
1944 -جىلدىڭ 22 -اقپانىندا ول سوڭعى رەت اتىسقا ارالاسادى. قارسى جاقتىڭ مەرگەنىمەن ۇزاق اڭدىسۋ كەزىندە ءبىرىنشى بولىپ وققا ىلىنەدى. قايسار ەر جارالى كۇيىندە قارسىلاسىنا وق اتىپ، ءدال تيگىزەدى. قوس مەرگەن وسىلايشا ءبىر-بىرىن اجال قۇشتىرعان. قازاق مەرگەنى تۋرالى سول كەزدە مايدان گازەتتەرى جارىسا جازدى. ءتىپتى ءبىر كۇندە 122 جاۋ اسكەرىن جايراتقانى تۋرالى اقپارات سۋرەتىمەن بىرگە بەرىلگەن. سويتكەن باتىر وزىنە لايىق قۇرمەتكە بولەنبەدى. وداق باتىرى، «حالىق قاھارمانى» سياقتى اتاقتار مەرگەنگە بۇيىرمادى. وسى ولقىلىقتىڭ ورنىن تولتىرۋ ءۇشىن جارمالىق جەرلەستەرى باتىردىڭ ەسكەرتكىشىن اۋدان ورتالىعى قالباتاۋ اۋىلىنا ورناتپاقشى. ول ءۇشىن جەرگىلىكتى كاسىپكەرلەر 5,5 ميلليون تەڭگە بولۋگە دايىن.
«ەسكەرتكىشتىڭ بيىكتىگى مەن قانداي ماتەريالدان دايىندالاتىنى ءالى بەلگىسىز. كۇزگە دەيىن قالباتاۋدىڭ دوستىق كوشەسىنە ورناتساق دەگەن جوسپار بار. باتىردىڭ اتقان وعى قيىس كەتپەگەن مەرگەن بولعانىن كونەكوزدەر بەرتىنگە دەيىن ايتىپ وتىراتىن. ەكىنشى دۇنيەجۇزىلىك سوعىس كەزىندە 397 جاۋ اسكەرىن ولتىرسە دە، لايىقتى قۇرمەت كورسەتىلمەدى. كەيىن دە اتى كىتاپتارعا ەنگەنى بولماسا، رەسمي اتاق بەرىلگەن جوق. ەندى تىم بولماسا، تۋعان جەرىندە ەڭسەلى ەسكەرتكىشى تۇرۋ كەرەك دەگەن ۇسىنىس ايتىلدى. ونى جەرگىلىكتى كاسىپكەرلەر دە قولداپ اكەتتى» - دەيدى اۋدان اكىمىنىڭ ورىنباسارى ايدار يبرايەۆ.
