يرانداعى جەر سىلكىنىسىنەن قۇربان بولعاندار سانى 400 دەن استى
استانا. قازاقپارات - يراننىڭ باتىسىنداعى كەرمانشاح پروۆينسياسىندا جەر سىلكىنىسى كەزىندە قايتىس بولعاندار سانى ارتىپ، 407 ادامعا جەتتى.
بۇل تۋرالى بۇگىن جەدەل جاردەم قىزمەتىنە سىلتەمە جاساپ يرنا اگەنتتىگى حابارلادى.
يراننىڭ جەدەل جاردەم قىزمەتىنىڭ مالىمەتتەرىنە قاراعاندا، كەرمانشاح پروۆينتسياسىنداعى جەر سىلكىنىسىنىڭ سالدارىنان جەرگىلىكتى ۋاقىت بويىنشا ساعات 18-30 عا دەيىن 407 ادام قايتىس بولعانى انىقتالدى. ال، زارداپ شەككەندەر 6,7 مىڭعا جۋىق ادامدى قۇراپ وتىر.
ايتا كەتەيىك، قۋاتى 7,3 ماگنيتۋدالىق جەر سىلكىنىسى جەكسەنبى كۇنى يراننىڭ باتىسىندا بولدى.
ەۋروپالىق- جەرورتا تەڭىزى سەيسمولوگيالىق ورتالىعىنىڭ حابارلاۋىنشا، جەر سىلكىنىسىنىڭ وشاعى كەرمانشاح پروۆينسياسىنىڭ باتىسىنداعى يراننىڭ ازگلە قالاسىندا جاتىر. ءزىلزالانىڭ وشاعىنىڭ تەرەڭدىگى 11 ك م.
قۋاتتى جەر سىلكىنىسىنەن سوڭ، جەراستى ءدۇمپۋى 150 رەت قايتالانعان. ولاردىڭ قۋاتى ريحتەر باعانى بويىنشا 2,3 بالدان 4,6 بالعا دەيىن جەتتى. جەراستى دۇمپۋلەرى وسى وڭىردەگى يراك، كۋۆەيت، ب ا ءا سياقتى ەلدەرگە دە سەزىلگەن. يراكتا 8 ادام قايتىس بولىپ، 400 ادام زارداپ شەككەن.
