الماتىنىڭ 400 دەن استام ەسترادا جۇلدىزى، قولونەرشى، شىعارماشىلىق وكىلى استانادا ونەرلەرىن كورسەتەدى
اتاپ ايتساق، 11- ماۋسىمدا «قازاقستان» ورتالىق كونسەرت زالىندا «ماحاباتپەن، الماتىدان!» اتتى كونسەرتتىك باعدارلامامەن مادەني كۇندەر اشىلادى. قازاق ەستراداسىنىڭ جۇلدىزدارى روزا رىمبايەۆا، قايرات نۇرتاس، مارجان اراپبايەۆا، ءمادينا ءسادۋاقاسوۆا، ايقىن، لۋينا، «دوس- مۇقاسان»، «رەنزو»، «ايۋمي»، «كەشيۋ»، «جىگىتتەر» توپتارى، «سارىن» دۋەتى، «سالتانات» ءانسامبلى، «بالا داۋىسى» بالالار بايقاۋىنىڭ جەڭىمپازدارى جانە باسقالارى ونەر كورسەتەدى.
12 -16 - ماۋسىم ارالىعىندا الماتىنىڭ مەملەكەتتىك قۋىرشاق تەاترى ق. قۋانىشبايەۆ اتىنداعى مۋزىكالىق- دراما تەاترىندا كۇنىنە ەكى رەت «قۇلىنشاق پەن بولتىرىك»، «ۆەسەلىە مەدۆەجاتا» اتتى ۇزدىك سپەكتاكلدەرىن قازاق جانە ورىس تىلدەرىندە ۇسىنادى. 16 - 17 - ماۋسىم ارالىعىندا «جاستار» تەاترىندا «الاتاۋ» ءداستۇرلى ونەر تەاترىنىڭ «اسقاقتاي بەر، قازاقتىڭ سازدى اۋەنى» اتتى مۋزىكالىق كەشى وتەدى. 11 -19 - ماۋسىم ارالىعىندا «ەتنو- اۋىل الماتى» كورمەسى اشىلادى. مۇندا ۇزدىك سۋرەتشىلەر مەن قولونەرشىلەر ءوز تۋىندىلارىن ۇسىنىپ، شەبەرلىك سىنىپتارىن وتكىزەدى.
17 - ماۋسىم كۇنى كورمەگە كەلۋشىلەرگە «سازگەن سازى» فولكلورلىق- ەتنوگرافيالىق ءانسامبلى كونسەرتتىك باعدارلاما ۇسىنادى. 18 - ماۋسىمدا حالىقارالىق «استانا ەكسپو - 2017» ارنايى كورمەسىنىڭ امفيتەاترىندا مادەني كۇندەردىڭ «اسقار تاۋلى الماتى!» اتتى قورىتىندى كونسەرتى وتەدى. كەلۋشىلەر قازاقتىڭ ۇلتتىق ءان- كۇي ونەرىنىڭ تارلاندارى اسىلبەك ەڭسەپوۆ، ەربولات شالدىبەكوۆ، رامازان ستامعازيەۆ، بەيبىت مۇسايەۆ، ەدىل قۇسايىنوۆ، عازيزا گابداحيموۆا، شولپان دارجانوۆا، ساۋلە جۇماباي، ازامات اسقاروۆ، « ۇلىتاۋ»، «ارت دالا»، «الاش ۇلى» توپتارى، «جەتىگەن»، «سازگەن سازى»، «سالتانات» انسامبلدەرى، ن. ءاشىروۆتىڭ دومبىراشىلارى، «ارلان» تەاترى ونەرپازدارىنىڭ ونەرىن تاماشالاي الادى.
اۆتور: گۇلميرا عوسمانالي
