نۇرتاس ادامباي «تاراز» فيلمىنىڭ تۇسىرىلىمىنە 400 مىڭ ا ق ش دوللارىن جۇمسادى

الماتى. قازاقپارات - الماتىدا قازاقستاندىق كينورەجيسسەر نۇرتاس ادامبايدىڭ «تاراز» اتتى كريمينالدىق دراماسىنىڭ جابىق كورسەتىلىمى ءوتتى، دەپ حابارلايدى قازاقپارات.

 «تاراز» فيلمى بالا كەزىنەن تاي- قۇلىنداي تەبىسىپ، بىرگە وسكەن اسان، ايدار جانە ساپار ەسىمدى دوستاردىڭ ءومىر جولى تۋرالى باياندايدى. وقيعا قازاقستاننىڭ ەڭ ءبىر كريمينالدى قالالارىنىڭ ءبىرى - «تارازدا» بولعان وقيعادان باستالادى. ادامباي بۇرىن مۇنداي تۋىندىلار جاساۋمەن اينالىسپاعان. سول سەبەپتى اۆتور فيلمدى قولعا الۋدىڭ كەرەگى بار ما، جوق پا، دەگەن ماسەلە توڭىرەگىندە كوپ ويلانعان.

رەجيسسەر فيلمدى ءوزى دايىنداعان جانە وندا باستى رولدەردىڭ ءبىرىن وينايدى. تۋىندىدا زورلىق- زومبىلىق ارەكەتتەرى وتە كوپ. سول سەبەپتى ونىڭ كەيبىر دۋبلدەرىن بىرنەشە مارتە ءتۇسىرۋ قاجەت بولعان.

«ءتۇسىرۋ الاڭىندا ادامداردى كادىمگىدەي ۇرىپ- سوعىپ، بۋىندىرىپ جاتتى. سول سەبەپتى دە شىعار ول ءبىرشاما ومىرشەڭ تۋىندى بولىپ شىقتى. ءبىز ءتۇسىرىلىم بارىسىندا ەڭ باستىسى - ساپا دەگەن ماسەلەنى نازاردا ۇستادىق. ءبىر توبەلەستەن بىرنەشە دۋبل جاساۋ قاجەت بولعان كەزدەر دە بولدى. ءبىراق، ەر ازاماتتار ءۇشىن بۇل ۇلكەن كەدەرگى بولماۋى ءتيىس»، - دەدى ادامباي.

 ونىڭ سوزىنشە، فيلمنىڭ بيۋدجەتى 400 مىڭ دوللاردى قۇرادى. «ءسابينا كەلىن» فيلمىنە قاراعاندا بۇل جولعى شىعىن ەكى ەسەگە كوپ.

فيلمدە باستى رولدەردى نۇرتاس ادامباي، اسان ءماجيت، ەركەبۇلان دايىروۆ، گۇلناز جولانوۆا، تولەگەن بايساقالوۆ، جاندوس ايباسوۆ، كامشات جولدىبايەۆا مەن وزگەلەر وينايدى.