باس پروكۋرور: بيزنەستى زاڭسىز تەكسەرگەن 400 دەن استام لاۋازىمدى تۇلعا جازالاندى

استانا. قازاقپارات - قاداعالاۋشى ورگانداردىڭ بيزنەسكە قىسىم كورسەتۋىن قىسقارتۋ - پروكۋراتۋرا جۇمىسىنىڭ نەگىزگى باسىمدىلىعى.

اقتوبە وبلىسىنىڭ كاسىپكەرلەرىمەن كەزدەسكەن ەلىمىزدىڭ باس پروكۋرورى جاقىپ اسانوۆ وسىلاي دەدى.

كەزدەسۋ بارىسىندا ج. اسانوۆ بيزنەستى قاداعالاۋشى ورگاندار قىسىمىنان قورعاۋعا باعىتتالعان نەگىزگى قۇرالدارعا توقتالىپ كەتتى.

«2015 -جىلى ءبىز تاۋەكەلدەردى باعالاۋ جۇيەسىن ەنگىزدىك. ونىڭ ءمانى - بارلىعىن جاپپاي ەمەس، تەك جوعارى قاۋىپ توبىنداعىلاردى عانا تەكسەرۋ. جىلدىڭ سوڭىنا دەيىن وسى جۇيەنى ءبىزدىڭ جاڭا «تەكسەرۋلەردىڭ ءبىرىڭعاي ءتىزىلىمى» سەرۆيسىمەن ينتەگراتسيالايمىز. ءبىر رەت باسۋ ارقىلى كىم جانە قايدا قۇقىق بۇزعانىن كورۋگە بولادى. تەكسەرۋشى سوندا بارادى. زاڭبۇزۋشىلىقتار تۋرالى بارلىق اقپارات تەكسەرۋلەر كارتاسىندا كورسەتىلەدى. كەز كەلگەن ادام سايتقا كىرىپ، قاجەتتى دەرەكتەردى كورە الادى. كىم ءجيى زاڭبۇزۋشىلىقتار جاساسا، سول اقىرىندا كليەنتتەرىن جوعالتادى»، - دەدى ول.

باس پروكۋروردىڭ ايتۋىنشا، ءوز كەزەگىندە تەكسەرۋلەردى ەلەكتروندىق تىركەۋ تەكسەرۋشىگە دە، سىبايلاس جەمقورلىققا قارسى قىزمەتتەرگە دە تەكسەرۋ بارىسىن ونلاين تۇردە قاداعالاپ وتىرۋعا دا مۇمكىندىك بەرەدى.

«سونىمەن قاتار، service.pravstat.kz سايتىندا، 115 Call-ورتالىعىندا نەمەسە موبيلدىك توپتاردىڭ تەلەفوندارى ارقىلى كاسىپكەر ونى تەكسەرۋدىڭ زاڭدىلىعىن بىلە الادى. 3 -جىلدا مىڭنان استام بيزنەس سۋبەكتىلەرى حابارلاستى. ءاربىر ۇشىنشىسىنە كومەكتەستىك، 400 دەن استام لاۋازىمدى تۇلعالاردى جازالادىق. بۇل سەرۆيستەردىڭ ت م د بويىنشا ۇقساستارى جوق. تەكسەرۋ قاجەت بولاتىن سالالاردى ودان ءارى قىسقارتۋدى جوسپارلاپ وتىرمىز. شەتەلدەر تاجىريبەسىن زەرتتەۋدەمىز»، - دەدى باس پروكۋرور.