وڭتۇستىك قازاقستاندا شەنەۋنىك جاپپارقۇلعا 400 مىڭ تەڭگە تۇراتىن كولىك ءنومىرىن سىيلاپ، مارتتىك تانىتتى - فوتو
شەنەۋنىك بۇل سىيلىعىن ريو وليمپياداسىنىڭ كۇمىس جۇلدەگەرىنىڭ سۋ جاڭا كولىگىنە «كورىمدىك» رەتىندە سىيعا تارتقان ۇقسايدى. بۇل تۋرالى سپورتشى ءوزىنىڭ الەۋمەتتىك جەلىدەگى پاراقشاسىندا ءبولىستى. «002» مەملەكەتتىك ءنومىرىن قولىنا ۇستاپ تۇرىپ سۋرەتكە تۇسكەن سپورتشى فوتوسىنىڭ استىنا «الىبەك اعا، راحمەت، ءنومىر ادەمى» دەپ جازدى. اقپاراتتى ناقتىلاۋ ءۇشىن زىلتەمىرشىنىڭ وزىنە حابارلاستىق. الايدا ونىمەن تىلدەسۋ مۇمكىن بولماعاندىقتان، جازيرانىڭ اكەسىمەن سويلەستىك.
«ەندى ونى جازيرانىڭ ءوزى ايتسىن. قازىر ءبىر نارسە دەپ ايتۋعا قورقىپ قالدىق قوي... ءبىراق، ءنومىردى نۇرتايەۆتىڭ سىيعا بەرگەنى راس»، - دەپ قىسقاشا جاۋاپ قايىردى جاپپارقۇلدىڭ اكەسى.
بەلگىلى بولعانداي، مەملەكەتتىك ءنومىردىڭ بۇل ءتۇرى شامامەن 400 مىڭ تەڭگەدەن استام تۇرادى. ايتا كەتەرلىگى، وڭتۇستىك قازاقستانداعى باسقارما باسشىلارىنىڭ باسىم كوپشىلىگىنىڭ جالاقىسى 200 مىڭ تەڭگەنىڭ ۇستىندە.
ەستەرىڭىزگە سالا كەتەيىك، وڭتۇستىك قازاقستان وبلىسىنىڭ اكىمى بەيبىت اتامقۇلوۆ تامىزدىڭ 31-ىندە ريودان جۇلدەمەن ورالعان زىلتەمىرشى جازيرا جاپپارقۇل مەن دزيۋدوشى وتگونتسەتسەگ گالبادراحقا پاتەر كىلتىن تابىس ەتىپ، جول تالعامايتىن تەمىر تۇلپار مىنگىزدى. قىمبات سىيلىققا يە بولعان سپورتشى جاپپارقۇل ەكى بولمەلى پاتەردى اتا-اناسىنا سىيعا تارتىپ، ال كولىكتى ءوزى تىزگىندەيتىنىن مالىمدەدى. ءتىپتى ول كولىك جۇرگىزۋ كۋالىگىن العانىنا ەكى جىل بولسا دا ءالى كۇنگە دەيىن جەكە ءوزىنىڭ تەمىر تۇلپارى بولماعانىن ايتتى.
