الەم اپتا ىشىندە: اۋعانستان مەن پاكىستانداعى جەر سىلكىنىسىنەن 400 دەن استام ادام قازا تاپتى

استانا. قازاقپارات - ءوتىپ بارا جاتقان اپتا ىشىندە الەم حالقى تاعى دا ءبىرقاتار قايعىلى وقيعانىڭ كۋاسى بولدى.

اتاپ ايتقاندا، دۇيسەنبى كۇنى اۋعان-پاكىستان شەكاراسىندا جەر سىلكىنىپ، سونىڭ سالدارىنان 400 دەن ادام كوز جۇمدى. اۋعانستاننىڭ، پاكىستاننىڭ جانە ءۇندىستاننىڭ سولتۇستىك بولىگىنىڭ كوپتەگەن تۇرعىندارى تابيعي اپاتتان زارداپ شەكتى.

سونىمەن قاتار وتكەن جەكسەنبى كۇنى كانادا جاعالاۋىندا بورتىندا 27 ادام بار «ليەۆيافان ІІ» كەمەسى سۋعا باتىپ كەتكەن بولاتىن.

اۋعانستان مەن پاكىستانداعى تابيعي اپات

دۇيسەنبى كۇنى اۋعانستاننىڭ سولتۇستىك-شىعىسىنىڭ شالعاي اۋدانىندا قۋاتتى جەر سىلكىنىسى ورىن الدى. ءزىلزالا كىندىگى اۋعانستان استاناسى كابۋل قالاسىنان سولتۇستىك-شىعىسقا قاراي، گيندۋكۋش تاۋ تىزبەگى تۇسىندا شامامەن 200 شاقىرىمدىق تەرەڭدىكتە تىركەلگەن.

جەر استى تەربەلىس شامامەن 1 مينۋتقا سوزىلىپ، پاكىستان، ءۇندىستان، قىرعىزستان جانە قازاقستاندا دا سەزىلدى. ا ق ش گەولوگيالىق قىزمەتىنىڭ بولجامىنا سايكەس، تابيعي اپاتقا يندوستان جارتى ارالىنىڭ ەۋرازيا قۇرلىعىنا قاراي باياۋ قوزعالۋى تۇرتكى بولعان.

سوڭعى دەرەكتەرگە قاراعاندا، جەر سىلكىنىسى سالدارىنان پاكىستاندا كەمىندە 272 ادام قازا تاۋىپ، شامامەن 2 مىڭ ادام ءتۇرلى دەنە جاراقاتىن العان. 13,5 مىڭنان استام ءۇي قيراعان. ال اۋعانستاندا تابيعي اپاتتان 14 ولكە زارداپ شەگىپ، 165 ادام مەرت بولسا، 7,6 مىڭنان استام باسپانا بۇلىنگەن. ءزىلزالا كەزىندە كەمىندە 12 بالانىڭ دا قازا تاپقانى بەلگىلى.

قايعىلى وقيعا اۋعانستاننىڭ تاحار ولكەسىندەگى قىزدارعا ارنالعان مەكتەپتە ورىن العان. جەر سىلكىنىسى كەزىندە 12 وقۋشى ءنوپىر استىندا تاپتالىپ قالعان. 25 قىزدىڭ اۋىر جاراقات العانى دا بەلگىلى. مۇنان بولەك، ءۇندىستاندا 4 ادام قازا تاپتى.

ەلباسى نۇرسۇلتان نازاربايەۆ اۋعانستان يسلام رەسپۋبليكاسىنىڭ پرەزيدەنتى اشراف عانيعا جانە پاكىستان يسلام رەسپۋبليكاسىنىڭ پرەمەر-ءمينيسترى ميان موحامماد ناۆاز شاريفكە ادام شىعىنىنا ۇشىراتقان كۇشتى ءزىلزالاعا بايلانىستى كوڭىل ايتۋ جەدەلحاتىن جولدادى. جەدەلحاتتا كوپ ادامنىڭ قازا تاپقانى جانە جاراقات العانى تۋرالى حاباردى مەملەكەت باسشىسىنىڭ زور كۇيزەلىسپەن قابىلداعانى اتاپ وتىلگەن.

نۇرسۇلتان نازاربايەۆ جەكە ءوزىنىڭ جانە قازاقستان حالقىنىڭ اتىنان قازا بولعانداردىڭ تۋىس-تۋعاندارى مەن جاقىندارىنا كوڭىل ايتتى.

بەيسەنبى كۇنى «ق ر ب ع م ع ك س ت ءا ە» م م سەيسميكالىق ستانسالار جەلىسى جەر سىلكىنىسىن تىركەدى. ءزىلزالا وشاعى اۋعانستان اۋماعىندا، الماتى قالاسىنان وڭتۇستىككە- باتىسقا قاراي 861 شاقىرىم قاشىقتىقتا ورنالاسقان. جەر سىلكىنىسىنىڭ ەنەرگەتيكالىق سىنىبى - 11.6. ماگنيتۋداسى - MPV 5.7. تەرەڭدىگى - 200 شاقىرىم»، - دەلىنگەن ۆەدومستۆونىڭ حابارلاماسىندا.

اۋعانستاندا جەر سىلكىنىسىنەن كەيىن ءتىرى قالعان تۇرعىندار بەيسەنبى كۇنى قيراندىلار استىندا قالعان دۇنيە-مۇلىكتەرىن قازىپ الا باستادى. زارداپ شەككەندەردىڭ باسىم بولىگى - كەدەيلەر. سوندىقتان ولاردىڭ بارلىعى دا مەملەكەت تاراپىنان كومەككە مۇقتاج.

باسپاناسىنان ايىرىلعان ونداعان مىڭ ادام قىس كەزىندە ءۇيسىز، قاجەتتى كورپە-كوپشىكپەن قاتار جىلى كيىمسىز دە قالاتىن ءتۇرى بار. ايتا كەتەرلىگى، قىس ايلارىندا وڭىردە اۋا تەمپەراتۋراسى 0 گرادۋستان دا تومەندەيدى دەپ كۇتىلۋدە.

«ليەۆيافان II» كەمەسى اپاتقا ۇشىرادى

جەكسەنبى كۇنى كانادا جاعالاۋىندا «ليەۆيافان II» كەمەسى سۋعا باتىپ كەتتى. 20 مەترلىك ءۇش پالۋبالى كەمە ۆارگاس ارالى مەن توفينو قالاسىنا تاقاۋ جەردە اپاتقا ۇشىرادى.

توفينو ۆانكۋۆەر ارالىندا ورنالاسقان. ول سۇر تىنىق مۇحيتى كيتىن كورۋدى قالايتىندار ءۇشىن بارىنشا تانىمال تۋريستىك ايماق سانالادى.

اپات ورىن العاننان كەيىن جەرگىلىكتى بيلىك كەڭ اۋقىمدى قۇتقارۋ وپەراتسياسىن جۇرگىزدى. وعان 2 ۇشاق، تىكۇشاق جانە جاعالاۋ كۇزەتىنىڭ 2 كەمەسى جۇمىلدىرىلدى. وپەراتسياعا بالىقشىلار مەن جەرگىلىكتى تۇرعىنداردىڭ كەمەلەرى دە قاتىستى. تۋريستىك كەمەنىڭ اپاتقا ۇشىراۋى توسىن بولعانى سونشالىق، ەكيپاج ءتىپتى SOS دابىلىن دا بەرىپ ۇلگەرە الماعان. الدىن الا تەرگەۋ امالدارىنىڭ دەرەگىنە سايكەس، كەمەنىڭ اپاتقا ۇشىراۋىنا كيت سەبەپ بولۋى مۇمكىن.

كۋاگەرلەردىڭ ايتۋىنشا، تۋريستەر توبى ءبىر مەزەتتە كەمەنىڭ جول جاق بورتىنا لاپ بەرگەن. ءدال وسى ساتتە ءجۇزىپ كەلە جاتقان كيت كەمەنى سوعىپ، سونىڭ سالدارىنان ول اۋدارىلىپ، سۋعا باتىپ كەتكەن. كەمە بورتىندا 27 ادام بولعان. ولاردىڭ 21  ءى قۇتقارىلىپ، 6 اۋى قازا تاپتى.

«ليەۆيافان II» كەمەسى كيتتەردى باقىلاۋ ساپارلارىن ۇيىمداستىراتىن كومپانياعا تيەسىلى ەكەنى بەلگىلى. ايتا كەتەرلىگى، 1998-جىلى ءدال وسى كومپانيانىڭ تاعى ءبىر كەمەسى 1998-جىلى توفينو تۇسىندا سۋعا باتقان بولاتىن.

اۆتور: مارلان جيەمباي