قازاق تىلىندەگى 4000 كىتاپتى وقۋعا مۇمكىندىك بەرەتىن ۇيالى قوسىمشا پايدا بولدى
ەلەكتروندى جيناق «WikiBilim» ق ق دامىتىپ جاتقان «قازاقستاننىڭ اشىق كىتاپحاناسى» اتتى ونلاين- جوباسى نەگىزىندە جۇزەگە اسىرىلىپ وتىر.
جوبا اۆتورلارى قازاقستاننىڭ مادەني مۇراسىنىڭ مۋلتيمەديالىق توپتاماسىن ساندىق فورماتتا قولجەتىمدى ەتۋ ارقىلى ۇلتتىق ادەبيەت، عىلىم، مادەنيەتكە قاتىستى تۋىندىلاردى جيناقتاۋ جانە اۆتورلىق قۇقىقتى ساقتاي وتىرىپ، كوپشىلىك اراسىندا تاراتۋدى ماقسات تۇتقان.
قازىرگى تاڭدا قازاقستاننىڭ www.kitap.kz اشىق كىتاپحاناسى قازاق مادەنيەتىمەن بايلانىستى تۋىندىلاردىڭ ەڭ تولىق ەلەكتروندىق توپتاماسىن، سونداي- اق، الەمدىك كوركەم جانە عىلىمي- كوپشىلىك ادەبيەت تۋىندىلارىنىڭ قازاق تىلىنە اۋدارىلعان جيناعىن ۇسىنىپ وتىر.
قازاقستاننىڭ www.kitap.kz اشىق كىتاپحاناسى 2012 - جىلى ىسكە قوسىلىپ، قازىرگى تاڭدا ونىڭ قولدانۋشىلار سانى ۇدايى ءوسىپ كەلەدى. كۇندەلىكتى سايتقا 2500 دەن اسا وقىرمان كىرەدى.
«قازاقستاننىڭ اشىق كىتاپحاناسىندا» 500 دەن اسا اۆتوردىڭ 4000 عا جۋىق كىتابى جيناقتالىپ، www.kitap.kz سايتىنا شىعارىلعان. جوباعا ءىلياس جانسۇگىروۆ، ساكەن سەيفۋللين، مۇحتار اۋەزوۆ، عابيدەن مۇستافين، قاسىم امانجولوۆ، باۋىرجان مومىش ۇلى، زەيىن شاشكين، جۇبان مولداعاليەۆ، قاليجان بەكحوجين، ساعي جيەنبايەۆ، عافۋ قايىربەكوۆ، مۇقاعالي ماقاتايەۆ، سافۋان شايمەردەنوۆ، زەينوللا قابدولوۆ، قالتاي مۇحامەدجانوۆ، ساكەن ءجۇنىسوۆ، ساۋىربەك باقبەرگەنوۆ سەكىلدى اۆتورلاردىڭ مۇراگەرلەرى العاشقىلاردىڭ ءبىرى بولىپ قولداۋ كورسەتتى. سونىمەن قاتار، توپتامانىڭ تولىق جۇمىس جاساۋىنا قازاق جازۋشىلارى ءابىش كەكىلبايەۆ، مۇحتار شاحانوۆ، سوفى سماتايەۆ، قابدەش ءجۇمادىلوۆ، شەرحان مۇرتازا، تولەن ابدىكوۆ، دۋلات يسابەكوۆ ءوز ۇلەستەرىن قوستى.
«قازاقستاننىڭ اشىق كىتاپحاناسى» جالپى مادەنيەتكە دەگەن كوزقاراسىمىزدى وزگەرتىپ وتىر. جوبا كەڭ وقىرمان قاۋىمىنا ادەبيەت تۋىندىلارىنا تۇراقتى تۇردە قول جەتكىزۋگە مۇمكىندىك بەرەدى. قوعامنىڭ مادەنيەتكە دەگەن قىزىعۋشىلىعى كۇننەن كۇنگە ارتىپ كەلە جاتقانىنا ءبىز كۋامىز. ءوز تاراپىمىزدان ءبىز ەلىمىزدىڭ مادەني مۇراسىن ءبىر جەرگە شوعىرلاندىرۋ ءۇشىن ايانباي ەڭبەك ەتىپ كەلەمىز»، - دەدى WikiBilim ق ق قامقورشىلار كەڭەسىنىڭ مۇشەسى نارتاي ءاشىم.
«كسەلل» كومپانياسى كوپشىلىك وقىرماندار الدىندا قازاق تىلىندەگى جارقىن ادەبيەت الەمىنە ەسىك اشۋ ءۇشىن www.kitap.kz سايتىندا جيناقتالعان كىتاپتاردى بەيىمدەپ، ولاردى سمارتفونداردا وقۋعا بولاتىنداي ۇيالى فورماتقا اۋدارۋعا كومەكتەستى.
ۇيالى قوسىمشا Android جانە iOS جۇيەلەرىندە قولجەتىمدى.
«مەملەكەتتىك ءتىلدى دامىتۋعا ارنالعان جوبالار «كسەلل» كومپانياسىنىڭ كورپوراتيۆتىك الەۋمەتتىك جاۋاپكەرشىلىگىندە باستى ورىن الىپ وتىرعان ماسەلەلەردىڭ ءبىرى. نارىقتىڭ كوشباسشىسى رەتىندە ءبىز مەملەكەتتىك تىلدەگى ەڭ ۇلكەن ونلاين- كىتاپحانالاردىڭ بىرىنە سمارتفوندار ارقىلى كىرۋگە جاعداي جاساۋدى كوزدەپ وتىرمىز. قازىرگى تاڭدا قازاقستاندىقتاردىڭ 40 پايىزعا جۋىعى سمارتفونداردى قولدانادى. ءبىز وسى قوسىمشانى قولدانۋشىلاردىڭ بارلىعىنا تەگىن ۇسىنىپ وتىرمىز. بۇل جوبا وقىرماندارىنىڭ سانىن بارىنشا كەڭەيتپەك. Kitap ۇيالى قوسىمشاسى قازاق تىلىندەگى كىتاپتارعا قىزىعۋشىلىقتى ارتتىرىپ، جالپى مەملەكەتتىك تىلدە قالام تارتىپ جۇرگەن جاڭا بەلدى جازۋشىلاردىڭ پايدا بولۋىنا جانە ادەبيەتتىڭ دامۋىنا سەپتىگىن تيگىزەدى دەپ ۇمىتتەنەمىز»، - دەپ اتاپ ءوتتى «كسەلل» ا ق باس اتقارۋشى ديرەكتورى ارتي وتس.
اۆتور: گۇلميرا عوسمانالي
