رەسەي تۇركياعا س-400 كەشەنىن 2020 -جىلى جەتكىزە باستاماق

«روستەح» مەملەكەتتىك كونگلومەراتىنىڭ باسشىسى سەرگەي چەمەزوۆ «كوممەرسانت» گازەتىنە بەرگەن سۇحباتىندا قۇنى 2,5 ميلليارد دوللارعا باعالاناتىن كەلىسىم بويىنشا تۇركياعا س-400 زىمىران كەشەنىنىڭ ءتورت ديۆيزيونى جەتكىزىلۋى ءتيىس ەكەنىن ايتتى. «كەلىسىمنىڭ جالپى قۇنىنىڭ 45 پايىزى الدىن الا تولەم، 55 پايىزى نەسيە تۇرىندە تولەنەدى» دەدى چەمەزوۆ.

تۇركيانىڭ رەسەيدەن س-400 زىمىران كەشەنىن ساتىپ الۋ شەشىمىن كەيبىر باتىس ەلدەرى ناتو مەن رەسەي اراسى شيەلەنىسكەن كەزدە انكارانىڭ اليانستى «مەنسىنبەي قاراۋى» دەپ باعالاعان. ماسكەۋ ۋكراينا شىعىسىنداعى سەپاراتيستەردى قولداپ، سيرياداعى قاقتىعىسقا ارالاسقان سوڭ رەسەي مەن ناتو اراسىنداعى قارىم- قاتىناس شيەلەنىسكەن.

تۇركيانىڭ س-400 كەشەنىن ساتىپ الاتىنى تۋرالى العاش تۇركيا پرەزيدەنتى رەجەپ ەردوعان قىركۇيەكتە حابارلاعان. انكارانىڭ بۇل شەشىمىنە قاتىستى «رەسەي قارۋ- جاراعى اليانستىڭ قورعانىس جۇيەسىنە ساي كەلمەيدى» دەگەن پىكىر ايتىلعان. تۇركيا قورعانىس ءمينيسترى نۋرەتتين كانيكلي 27 - جەلتوقساندا زىمىرانعا قاتىستى كەلىسىم اياقتالعانىن مالىمدەدى.

www.azattyq.org