جىلىنا 40 مىڭ ادام عانا 10 سوتىق جەر الا الادى
بۇل تۋرالى بۇگىن ق ر ۇكىمەتىندەگى باسپا ءسوز ءماسليحاتىندا ەلىمىزدىڭ ينۆەستيتسيالار جانە دامۋ ءمينيسترى جەڭىس قاسىمبەك ءمالىم ەتتى، دەپ حابارلايدى قازاقپارات.
«نۇرلى جەر» باعدارلاماسى بويىنشا جەكەمەنشىك ۇيلەر سالىنىپ جاتىر. جالپى وتكەن اپتادا ءبىز الماتى وبلىسىندا بولعان ەدىك. ول جاقتا سالىناتىن تۇرعىن ۇيلەردىڭ 80 پايىزىن 10 سوتىق جەرگە سالىناتىن جەكەمەنشىك ۇيلەر قۇرايدى. ءبىراق، بۇگىنگى كۇنى تىزىمدە 10 سوتىق جەر العىسى كەلەتىن ادامدار وتە كوپ. سوندىقتان اكىمشىلىكتەرمەن 10 سوتىق جەردى ينفراقۇرىمى تارتىلعان جاعدايدا عانا بەرۋ تۋرالى كەلىسىمگە كەلدىك. ال ينفراقۇرىلىم تارتۋعا بيۋدجەتتەن قارجى قاراستىرىپ، ءبولىپ وتىرمىز. ءاربىر وبلىسقا 1,5 ميلليارد تەڭگەدەن استام قارجى بولىنەدى. تىزىمدە ادام كوپ. ءبىراق 10 سوتىق جەردى جىلىنا 40 مىڭ عانا ادام الا الادى»، - دەدى قاسىمبەك ب ا ق وكىلدەرىنىڭ ساۋالىنا وراي.
سونىمەن قاتار مينيستر باسپانانى باستاپقى جارناسىز نەسيەگە الۋ تەتىگى تۇرعىن ءۇي جيناق بانكىندە قاراستىرىلماعاندىعىن اتاپ ءوتتى. «تۇرعىن ءۇي جيناق بانكى ارقىلى باسپاناعا نەسيە الۋ ءۇشىن العاشقى جارنا بولۋى قاجەت»، - دەپ اتاپ ءوتتى مينيستر.
