الماتى ەكونوميكاسى 4 ايدىڭ ىشىندە 9,2 پايىزعا تومەندەگەن

الماتى. قازاقپارات - الماتىدا ەكونوميكانىڭ قاي سالاسىندا تومەندەۋ بولعانى بەلگىلى بولدى. بۇل تۋرالى قالا اكىمى باقىتجان ساعىنتايەۆ ونلاين بريفينگ كەزىندە ايتتى، دەپ حابارلايدى قازاقپارات ءتىلشىسى.

الماتى قالاسىنىڭ 2020 -جىلعى قاڭتار- ءساۋىر ايلارىنداعى ەكونوميكالىق كورسەتكىشى بىلتىرعىمەن سالىستىرعاندا 9,2 پايىزعا تومەندەگەن. «قالادا جالپى ەكونوميكالىق كورسەتكىش 9,2 پايىزعا، ينۆەستيتسيا 8,6 پايىزعا كەمىگەن. ينفلياتسيا بىلتىرعىمەن سالىستىرعاندا 3,4 پايىزعا وسكەن. اسىرەسە ساۋدا جانە كولىك تاسىمالى سالاسى كوبىرەك زارداپ شەكتى»، - دەدى ب. ساعىنتايەۆ.

ونىڭ ايتۋىنشا، سوڭعى 5 ايدا 174 ميلليارد تەڭگە سالىق تۇسكەن. قاڭتار، اقپان، ناۋرىز ايلارىندا سالىق ءتۇسىمى + كورسەتىپ تۇرسا، ءساۋىر ايىندا - 3,3 ميلليارد تەڭگە، مامىردا 10,8 ميلليارد تەڭگە شىعىن كەلتىرىلدى.

«وسى ورايدا بارلىق كاسىپكەرلىك سۋبەكتىلەرىندە بارىنشا جۇمىس ورنىن ساقتاپ قالۋ كوزدەلىپ وتىر. سونىمەن قاتار، ولاردى پاندەميا احۋالىندا جۇمىس ىستەۋگە بەيىمدەۋگە تۋرا كەلەدى»، - دەدى اكىم.

اۆتور: گۇلميرا عوسمانالي