اقمولالىقتارعا 4-8-اقپان ارالىعىندا جولعا شىقپاۋعا كەڭەس بەرىلدى

كوكشەتاۋ. قازاقپارات - اقمولا وبلىسىنىڭ تۇرعىندارىنا بيىلعى جىلعى 4-8-اقپان ارالىعىندا الىس ساپارلارعا شىقپاۋعا كەڭەس بەرىلدى، دەپ حابارلايدى قازاقپارات ءتىلشىسى وبلىستىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، مۇنداي ەسكەرتۋ جولدارداعى توتەنشە جاعدايلاردىڭ الدىن الۋ ءۇشىن بەرىلىپ وتىر.

«2021 -جىلدىڭ 4-8-اقپانى ارالىعىندا وڭىردە قارلى بوران، جاڭبىر جاۋىپ، كوكتايعاق بولاتىنى كۇتىلۋدە. وسىعان بايلانىستى جولدارداعى توتەنشە جاعدايلاردىڭ الدىن الۋ ءۇشىن جول پوليتسەيلەرى جۇرگىزۋشىلەرگە جەكە اۆتوكولىكپەن اسا قاجەتتىلىكسىز جۇرمەۋگە كەڭەس بەرەدى. ەگەر ساپاردى كەيىنگە قالدىرۋ مۇمكىن بولماسا، قوزعالىس ەرەجەلەرىن قاتاڭ ساقتاۋ كەرەك، جىلدامدىقتى بارىنشا تومەندەتۋ، قاشىقتىقتى، بۇيىرلىك ارالىقتى ساقتاۋ، جاياۋ جۇرگىنشىلەرگە كوبىرەك نازار اۋدارۋ، مۇقيات جانە اباي بولۋ كەرەك»، - دەپ ءتۇسىندىردى ۆەدومستۆودان.

پوليتسيا قىزمەتكەرلەرى شتاتتان تىس جاعداي تۋىنداعان كەزدە 102 جانە 112 ارنايى جەلىلەرى بويىنشا حابارلاۋعا بولاتىندىعىن ەسكە سالادى.