قازاقستاندا الىناتىن مۇنايدىڭ بالانستىق قورى 4 ميلليارد 847 ميلليون توننانى قۇرايدى - بوزىمبايەۆ
دەپ حابارلايدى قازاقپارات.
«قازاقستاندا 270 تەن استام مۇناي- كەن ورىندارى تىركەلگەن. بيىلعى جىلدىڭ باسىنداعى جاعداي بويىنشا الىناتىن مۇنايدىڭ بالانستىق قورلارى 4 ميلليارد 847 ميلليون توننانى قۇرايدى. ولاردىڭ ىشىندە 75 پايىزى قاشاعان، قاراشىعاناق جانە تەڭىز كەن ورىندارىنىڭ قورى. ال، جالپى وسى سالادا جەر قويناۋىن پايدالانۋعا ارنالعان 210 كەلىسىمشارت جاسالعان. ولاردىڭ ىشىنەن 59 كەلىسىمشارت قورلاردى باعالاۋ كەزەڭىندە، ول بالانستىق مۇناي قورلارىنىڭ 4 پايىزىن قۇرايدى. قالعان كەن ورىندارى 21 پايىزىن الىپ وتىر، - دەدى مينيستر.
ونىڭ ايتۋىنشا، كەن ورىندارى كەڭەس زامانىندا جۇرگىزىلگەن بارلاۋ جۇمىستارى بارىسىندا تابىلعان. ال 2005-2015 -جىلدارى ارالىعىندا 50 مۇناي كەن ورنى اشىلدى. الىناتىن مۇنايدىڭ جالپى قورى ا ب س1 ساناتى بويىنشا 164 ميلليون توننا جانە س2 ساناتى بويىنشا 169 ميلليون توننانى قۇرايدى.
«قازىر يگەرىلىپ جاتقان كەن ورىندارىنىڭ كوبىسى ءوزىنىڭ شىنايى ءوندىرۋ كەزەڭىنە جەتتى. ولار وزەن، قالامقاس، جەتىباي، قاراجامباس، قۇمكول جانە تاعى دا باسقا كەن ورىندارى. مۇناي ءوندىرۋ ءوندىرىسىنىڭ ءوسۋىن تەڭىز، قاراشىعاناق، قاشاعان كەن ورىندارىن يگەرۋدى كۇشەيتۋ مەن گەولوگيالىق بارلاۋ جۇمىستارىن بەلسەندەندىرۋ جولىمەن عانا جەتۋگە بولادى. وسى باعىتتا گەولوگيالىق بارلاۋعا ينۆەستيتسيالاردى تارتۋعا قولايلى جاعداي جاساۋ ءۇشىن ەنەرگەتيكا مينيسترلىگى جۇيەلى جۇمىس جۇرگىزىپ كەلەدى. سونىمەن قوسا، زاڭناماعا وزگەرىستەر ەنگىزۋ جۇمىستارىن اتقارىپ وتىر»، - دەدى بوزىمبايەۆ.
اۆتور: مارلان جيەمباي
