بالا كۇتىمى بويىنشا 4,5 مىڭنان استام ەلوردالىقتىڭ الاتىن جاردەماقىسى ۇزارتىلدى
مۇنى وڭىرلىك كوممۋنيكاتسيالار قىزمەتىندە ەڭبەك جانە الەۋمەتتىك قورعاۋ كوميتەتىنىڭ استانا قالاسى بويىنشا دەپارتامەنتى باسشىسىنىڭ الەۋمەتتىك سۇراقتار بويىنشا ورىنباسارى دامەجان سادۋاقاسوۆا ايتتى، دەپ حابارلايدى قازاقپارات ءتىلشىسى.
«مەملەكەت باسشىسى 2022-جىلعى 1- قىركۇيەكتەگى قازاقستان حالقىنا جولداۋىندا بالا كۇتىمى بويىنشا جاردەماقى تولەۋ مەرزىمىن 1 جىلدان 1,5 جىلعا دەيىن ۇلعايتۋ تۋرالى تاپسىرما بەردى. وسىلايشا، 2023-جىلدىڭ 1- قاڭتارىنان باستاپ بوسانعان ايەلدەرگە 1,5 جىلعا جاردەماقى تاعايىندادى. ال 2023-جىلدىڭ 1- قاڭتارىنا دەيىن جاردەماقى الىپ وتىرعانداردىڭ تولەمى اۆتوماتتى تۇردە تاعى 6 ايعا ۇزارتىلدى. جالپى، 1- قاڭتاردان باستاپ ەلوردا بويىنشا 4,5 مىڭنان استام ادامنىڭ بالا كۇتىمى بويىنشا جاردەماقى مەرزىمى ۇزارتىلدى»، - دەپ ءمالىم ەتتى دامەجان سادۋاقاسوۆا.
قوسا كەتسەك، بۇعان دەيىن قازاقستاندا بالا كۇتىمى بويىنشا جاردەماقى الاتىنداردىڭ زەينەتاقى جارنالارى سۋبسيديالاناتىنىن حابارلاپ ەدىك.
