قازاقستاندا 4,5 مىڭ ۆاكسينا نە ءۇشىن جويىلدى؟

نۇر-سۇلتان. قازاقپارات - ەلىمىزدە تەمپەراتۋرا رەجيمى ساقتالماعانى ءۇشىن كوروناۆيرۋسقا قارسى 4,5 مىڭ ۆاكسينا جارامسىز دەپ تانىلدى.

بۇل تۋرالى ق ر دەنساۋلىق ساقتاۋ ءبىرىنشى ۆيتسە-ءمينيسترى مارات شورانوۆ ايتتى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتى بارىسىندا ءبىرىنشى ۆيتسە-مينيستر ەلىمىزدە كوروناۆيرۋسقا قارسى ۆاكسيناتسيا باستالعاننان بەرى ۆاكسينانى ساقتاۋ، تاسىمالداۋ ماسەلەسىنە ۇنەمى مونيتورينگ جۇرگىزىلىپ كەلە جاتقانىن ايتتى.

«سول مونيتورينگىگە سايكەس، وسى جىلدىڭ اقپان ايىننان باستاپ 4,5 مىڭ ۆاكسينانىڭ تەمپەراتۋرا رەجيمى ساقتالماعانى انىقتالدى. ەرەجەگە سايكەس، مۇنداي ۆاكسينالار ەسەپتەن شىعارىلۋى كەرەك. بۇل ۆاكسينالاردى ادامدارعا ەگۋگە بولمايدى. سوندىقتان ولار ەسەپتەن شىعارىلدى»، - دەدى مارات شورانوۆ.