قىتاي اۋانى تازارتۋعا 4,5 ميلليارد دوللار جۇمسادى
استانا. قازاقپارات - قىتايدىڭ ۇلكەن قالالارىنداعى ەكولوگيالىق احۋال وڭالا باستادى، دەپ جازادى حابار 24.
بيلىك بۇل ناتيجەگە جىلىتۋ ماۋسىمى كەزىندە كومىردى ەلەكتر قۋاتىمەن الماستىرۋ ارقىلى قول جەتكىزدى. قازىر ەلدىڭ سولتۇستىك ايماقتارىنداعى مەگاپوليستەردە كورسەتكىش اناعۇرلىم جاقسارعان. وسىلايشا قىتاي 2020-جىلعا دەيىن كومىر پايدالانۋدى 60 پايىزعا دەيىن ازايتپاق.
بەيجىڭدە ەلەكتر قۋاتىن پايدالانۋدىڭ رەكوردتىق دەڭگەيى تىركەلدى. قىتاي استاناسىندا ونىڭ كولەمى 17,8 ميلليون ك ۆ ت- تى قۇرادى.
مامانداردىڭ ايتۋىنشا، جىلىتۋدى جاپپاي ەلەكتر قۋاتىنا كوشىرۋگە بايلانىستى ەنەرگەتيكالىق جۇكتەمەگە كۇش ءتۇستى. قازىرگى جىلىتۋ ماۋسىمىنىڭ ەڭ قاۋىرت شاعىندا توقتى پايدالانۋ وتكەن جىلمەن سالىستىرعاندا 11 پايىزعا ارتىپ وتىر. كومىر جاعۋدى ازايتقانى اۋا سىناماسىنان دا سەزىلدى. قالادا قورشاعان ورتاعا بولىنەتىن زياندى زاتتاردىڭ مولشەرى 35 پايىزعا ازايدى. بۇل - سوڭعى 5 جىلدا بولماعان كورسەتكىش.
«كومىر وتىنىنىڭ ورنىن تولتىرۋ ماقساتىندا قىتاي قازىر بالامالى ەنەرگيا كوزدەرىن دامىتۋعا باستى نازار اۋدارىپ وتىر. 2010-جىلدان باستاپ ۇكىمەت قورشاعان ورتانىڭ ساپاسىن باقىلاۋعا الدى. ال ۇلكەن قالالارعا اۋانىڭ لاستانۋ دەڭگەيىن 10 پايىزدان اسىرماۋى ءتيىس دەگەن تاپسىرما جۇكتەلدى»، - دەيدى قالانى دامىتۋ جانە قورشاعان ورتانى زەرتتەۋ ورتالىعىنىڭ ديرەكتورى پان تسزياحۋا.
بەيجىڭدەگى قاتتى وتىن جاعىپ كەلگەن 1 ميلليوننان استام تۇرعىن ءۇي توقپەن جىلىتۋ جۇيەسىنە كوشىرىلدى. ەنەرگەتيكالىق جۇكتەمەنىڭ 40 پايىزى وسى ماقساتقا جۇمسالىپ وتىر. مەگاپوليستەگى ەكولوگيالىق احۋالدىڭ جاقسارعانىن تۇرعىندار دا سەزگەنىن ايتادى.
«وتكەن جىلدارمەن سالىستىرعاندا بيىل كوك اسپاندى جيىرەك كورەتىن بولدىق. ەشقانداي ماسكا كيمەي-اق، جۇمىسقا كوڭىلدى بارامىن. بىلتىر ءتۇتىن كۇندەرى سىرتقا شىقپاۋعا تىرىساتىنمىن، قازىر ولاي ەمەس»، - دەيدى بەيجىڭ قالاسىنىڭ تۇرعىنى تاو ليان.
بەيجىڭ قالاسىنىڭ قورشاعان ورتانى قورعاۋ باسقارماسى سوڭعى 2 جىلدا اۋانى تازارتۋعا 4,5 ميلليارد دوللار جۇمسادى. جىلىتۋ جۇيەسىن ەلەكتر قۋاتىنا كوشىرە الماي وتىرعاندارعا تەحنيكالىق جانە ماتەريالدىق كومەك جاسادى. ەندى مەگاپوليستىڭ اكىمشىلىگى 2018-022 -جىلدارعا ارنالعان جاڭا جوسپار ازىرلەپ جاتىر. قازىر قىتاي ەلدىڭ سولتۇستىك ايماقتارىن بىرتىندەپ ەلەكتر قۋاتىمەن قوسا، تابيعي گازعا دا كوشىرمەكشى.
